«Ավիակոմպանիա Արմենիա» («Aircompany Armenia») ընկերությունն այսօր հայտարարել է, որ վերանվանվելու է «Air Dilijans»: 2015 թ. դեկտեմբերին հիմնադրված այս ավիաընկերությունը, որը թռիչքներ է իրականացնում 2016-ի ամառվանից, հայտնել է, որ անվանափոխության պատճառն այս պահին Հայաստանում համահունչ անվանումներով մի շարք ընկերությունների առկայությունն է:

«Որոշումը կայացվել է մեր ուղեւորների շահերից ելնելով, նրանց ժամանակը խնայելու եւ ավիաընկերության ծառայություններից օգտվելիս հարմարավետություն ապահովելու նպատակով»,- հայտարարել է ավիափոխադրողը:

Նկատենք, որ այս պահին մեր երկրում կոմերցիոն ուղեւորափոխադրումներ են կատարում նմանատիպ անվանումներով հետեւյալ ընկերությունները՝ «Armenia Airways», «Armenian Helicopters», «Fly One Armenia», «Armenian National Airlines» (առավել հայտնի է որպես «Fly Arna»), «Armenian Airlines»: Այսինքն՝ 6 ընկերության անվան մեջ առկա է(ր) «Armenia(n)» բառը, ինչն ավիացիային ոչ մոտ մարդկանց շրջանում իսկապես շփոթության պատճառ էր դառնում:

Չնայած ավիաօպերատորը նշել է, որ «կվերանվանվի «Air Dilijans»», պետռեգիստրից տեղեկանում ենք, որ անվանափոխություն արդեն կատարվել է, եւ հիմա ընկերությունը կոչվում է «Էյր Դիլիջանս» ՍՊԸ: Ըստ էության, նոր անվանումը որոշակի բառախաղ է. մի կողմից՝ Դիլիջան քաղաքի անունն է կիրառված, մյուս կողմից՝ ֆրանսերեն «diligence» («դիլիժանս») նշանակում է ձիակառք, որը 17-20-րդ դարերում տարածված տրանսպորտային միջոց էր: Սա ձիերի լծված փակ կառք էր մի քանի նստատեղով, որով ուղեւորների ու փոստի միջքաղաքային փոխադրումներ էին կատարվում նախկինում:

Վերադառնալով արդեն նախկին «Ավիակոմպանիա Արմենիային»՝ պետք է հիշեցնենք, որ այն 2015-ի դեկտեմբերին հիմնադրել են գյումրեցի Աշոտ Թորոսյանը (51 %) եւ թբիլիսցի Ռոբերտ Օգանեսյանը (25 %), որոնց մեկ ամիս անց միացել է վրացի Թամազ Գաիաշվիլին (24 %): Վերջինս վրացական երկնքում նախկինում առաջատար դիրք զբաղեցնող «Georgian Airways» ավիաընկերության հիմնադիրն էր, իսկ Օգանեսյանը՝ դրա գլխավոր տնօրենի առաջին տեղակալը:

Ռոբերտ Օգանեսյան, Թամազ Գաիաշվիլի (արխիվային լուսանկար)

Այն ժամանակ հայկական մամուլում լուրեր տարածվեցին, որ Թորոսյանն ատամնաբույժ է, բայց իրականությունն այն է, որ նրա մասնակցությունն «Արմենիայի» մեջ ձեւական էր, ինչը պայմանավորված էր օրենքով:

«Ավիացիայի մասին» օրենքը սահմանում է, որ կոմերցիոն փոխադրումների իրավունք տվող ՕՇՎ (օդանավ շահագործողի վկայական) կարող են ստանալ այն իրավաբանական անձինք, որոնց առնվազն 51 տոկոսը պատկանում է ՀՀ քաղաքացիներին կամ Հայաստանում գրանցված այլ իրավաբանական անձանց: Պատահական չէ, որ ատամնաբույժ Ա. Թորոսյանը հենց 51 տոկոսի սեփականատեր էր գրանցվել, սակայն 2017-ի դեկտեմբերին այդ բաժնեմասն անցել է ՀՀ քաղաքացի դարձած Ռ. Օգանեսյանին, ով նաեւ ավիաընկերության տնօրենն է: Մնացած 49 տոկոսը Թ. Գաիաշվիլունն է (իրական շահառուների ներկա հայտարարագիրը՝ այստեղ):

ՍՊԸ-ի իրավաբանական հասցեն Երեւանի Մալաթիա-Սեբաստիա վարչական շրջանի Ճառագայթային փողոցի Վ շենքի այն բնակարանն է, որտեղ հաշվառված է «Georgian Airways»-ի հայաստանյան ներկայացուցչության ղեկավար Ռուբեն Բաղդասարովը: Նրա բնակարանում են գրանցված թե՛ ներկայացուցչությունը, թե՛ Ռոբերտ Օգանեսյանը:

Ինչպես արդեն գրել ենք, 2022 թ. «Ավիակոմպանիա Արմենիան» կատարել է 2554 թռիչք ու վայրէջք եւ տեղափոխել 228.204 ուղեւոր: Այս ցուցանիշով ընկերությունը նախորդ տարի եղել է 5-րդը հայկական շուկայում: 

Այս պահին «Aircompany Armenia»/«Air Dilijans»-ը շահագործում է 1 հատ «Boeing 737-500» տիպի օդանավ (հայկական գրանցումը՝ EK-73736), որով թռիչքներ է կատարում դեպի Մոսկվա («Վնուկովո» օդանավակայան) եւ Թբիլիսի: 

Առաջին լուսանկարում՝ EK-73736-ը՝ Մոսկվայի երկնքում, 08.10.2022, հեղ.՝ Մարիաննա Ռիչկովսկայա (jetphotos.com)