«ՄՏՍ Հայաստան» ՓԲԸ-ն այս տարվա հունվարի 26-ին դիմել է Հանրային ծառայությունները կարգավորող հանձնաժողով (ՀԾԿՀ)՝ ընկերության նկատմամբ հսկողության փոխանցման համաձայնություն ստանալու համար։ Ավելի պարզ ասած՝ ընկերության բաժնետերերը մտադիր են այն վաճառել։ Քանի որ «ՄՏՍ Հայաստան»-ը հանրային ծառայություններ մատուցող ընկերություն է, հետևաբար, ինչպես օրենքն է պահանջում, բաժնետոմսերը վաճառելու համար պետք է համաձայնություն ստանան նաև ՀԾԿՀ-ից։

Սակայն, ինչպես տեղեկանում ենք հանձնաժողովի՝ ապրիլի 12-ին կայանալիք նիստի որոշման նախագծից, հանձնաժողովը մտադիր է մերժել «ՄՏՍ Հայաստան»-ի հայտը։ 

«ՄՏՍ Հայաստան»-ի ներկա բաժնետերերը

Ըստ Հանրային ծառայությունները կարգավորող հանձնաժողովի (ՀԾԿՀ) տրամադրած փաստաթղթի՝ «ՄՏՍ Հայաստան»-ի (ապրանքանիշը՝ Viva MTS) միակ բաժնետերը Կիպրոսում գրանցված «Արամայո ինվեսթմենթս լիմիթեդ» ՍՊ ընկերությունն է։ «Արամայո ինվեսթմենթս լիմիթեդ»-ն էլ իր հերթին պատկանում է Լյուքսեմբուրգի Մեծ Դքսությունում գրանցված «Ալլեգրետտո հոլդինգ» ՍՊԸ-ին։

«Ալլեգրետտո Հոլդինգ»-ն էլ պատկանում է ռուսաստանյան հեռահաղորդակցության օպերատոր «Մոբիլնիե Տելեսիստեմի» հանրային բաժնետիրական ընկերությանը (ПАО «МТС»): 

Այդպիսով՝ «ՄՏՍ Հայաստան»-ը ռուսական «ՄՏՍ» խմբի անդամ է։ 

Այդ մասին նշված է նաև «ՄՏՍ»-ի կայքում։ 

Հայտը մերժվել է. գործարքը վնասում է կամ կարող է վնասել ազգային անվտանգությանը կամ պետական շահերին

Ըստ հանրային ՀԾԿՀ ներկայացված հայտի՝ Կիպրոսում գրանցված «Ֆեդիլքո գրուպ լիմիթիդ» ընկերությունը մտադիր է գնել «ՄՏՍ Հայաստան»-ի միակ բաժնետեր հանդիսացող «Արամայո ինվեսթմենթս լիմիթեդ» ընկերությունը։ Արդյունքում կիպրոսյան ընկերությանը կանցներ «ՄՏՍ Հայաստան»-ի նկատմամբ հսկողությունը։

Այդպիսով, ընկերությունն այլևս չէր հանդիսանա ռուսական «ՄՏՍ խմբի» մասնակից, ինչը ևս հաշվի է առնվել հայտը մերժելու ժամանակ։

Բարձր տեխնոլոգիական արդյունաբերության նախարարությունը քննարկել է «ՄՏՍ Հայաստան»-ը վաճառելու հարցը և առարկել։

Մերժելու հիմքում նշված է, որ ըստ օրենքի՝ գործարքի համաձայնությունը կարող է մերժվել, եթե իրավասու մարմնի գնահատմամբ այն վնասում է կամ կարող է վնասել ազգային անվտանգությանը կամ պետական շահերին։ Ըստ էության, նախարարությունն էլ իր հերթին հարցը քննարկել է Ազգային անվտանգության ծառայության հետ։

Այս որոշումն ուժի մեջ մտնելու պահից երեսուն օրվա ընթացքում «ՄՏՍ-Հայաստան»-ը այն կարող է բողոքարկել Հանձնաժողովում կամ երկու ամսվա ընթացքում՝ վարչական դատարանում։

«Վիվա ՄՏՍ»-ի հանրային կապերի բաժնից մեզ հետ զրույցում հրաժարվեցին որևէ բանավոր մեկնաբանություն տալ Հանրային ծառայությունները կարգավորող հանձնաժողովի որոշման վերաբերյալ։

Գլխավոր լուսանկարը՝ «Վիվա ՄՏՍ»-ի ֆեյսբուքյան էջից