Կաննի 19-րդ կինոփառատոնում (1966թ․) «Բարև, ես եմ» ֆիլմի պրեմիերայից հետո կինոյի հայտնի տեսաբան ժորժ Սադուլը գրել է․ «Ում հետաքրքրում են նորագույն ֆիլմերը, պետք է հիշեն Ֆրունզե Դովլաթյան անունը»։

Այս ֆիլմը կինոյում մեծ ճանապարհ բացեց ոչ միայն ռեժիսոր Ֆրունզե Դովլաթյանի, այլև դերասաններ Արմեն Ջիգարխանյանի, Նատալյա Ֆատեևայի համար: Իրենց առաջին դերն էին խաղում ապագա մեծանուն դերասանուհիներ Մարգարիտա Տերեխովան և Գալյա Նովենցը։ Ալբերտ Յավուրյանի օպերատորական լուծումներով, Մարտին Վարդազարյանի երաժշտական ձևավորմամբ՝ «Բարև, ես եմ» ֆիլմը ճանաչելի դարձրեց հայ կինոն միջազգային հարթակներում։

Առնոլդ Աղաբաբովի սցենարով նկարահանված ֆիլմը պատմում է երիտասարդ գիտնական Արտյոմ Մանվելյանի մասին։ Գլխավոր հերոսի նախատիպը միջուկային ֆիզիկոս, Հայաստանի ֆիզիկայի ինստիտուտի հիմնադիր Արտեմ Ալիխանյանն է։

Ֆիլմը երիտասարդ գիտնական Արտյոմի (դերակատար Արմեն Ջիգարխանյան) և Լյուսյայի (դերակատար Նատալյա Ֆատեևա) սիրո մասին է։ Արտյոմի և Օլեգի (դերակատար Ռոլան Բիկով) ընկերության, պատերազմի կորուստների, գիտական գործունեության, սիրո և կարոտի մասին է։ 

Կադր «Բարև, ես եմ» ֆիլմից, 1965թ.

Ֆիլմը մասնակցել է 1966թ․ Կաննի կինոփառատոնին, ներկայացվել է «Ոսկե արմավենու ճյուղի», իսկ 1967 թվականին արժանացել է Հայկական ԽՍՀ պետական մրցանակի։

2023թ․ Հայաստանի ազգային կինոկենտրոնի նախաձեռնությամբ և «Հայաստան» համահայկական հիմնադրամի ֆինանսական աջակցությամբ վերականգնված «Բարև ես եմ» ֆիլմը կվերադառնա Կանն։ Այն ընդգրկվել է Կաննի  կինոփառատոնի «դասականներ» բաժնում։ Մայիսի 16-27-ը տեղի ունեցող Կաննի կինոփառատոնի դասականներ բաժնում՝ կինոյի լեգենդներ Ժան Լյուկ Գոդարի, Ման Ռեյի, Յասուձիրո Օձուի, Ալֆրեդ Հիչքոքի ֆիլմերի շարքում կցուցադրվի նաև Ֆրունզե Դովլաթյանի «Բարև, ես եմ» ֆիլմը։