Lուսանկարչությունը միջազգային լեզու է, այն «խոսում է» աշխարհի հետ առանց թարգմանչի` պատմելով  իրականությունը պատկերներով։ Արդեն 5-րդ ամիսն է Արցախը  շրջափակման մեջ է․ Ադրբեջանը փակել է Արցախը Հայաստանին՝ արտաքին աշխարհին կապող միակ ճանապարհը՝ այդպիսով Արցախում ստեղծել  հումանիտար ճգնաժամ։

Դավիթ Ղահրամանյան․ «Բանտարկված պայքար»

Դավիթ Ղահրամանյան․ «Պայքար»

Արցախում ապրող լուսանկարիչները իրենց լուսանկարներում վավերագրել են շրջափակման մեջ սննդամթերքի, էներգիայի սահմանափակումների և հոգեբանական լարված վիճակի մեջ ապրող մարդկանց առօրյան, կենցաղը։

Նարե Առուշանյան․ «Մեկ օր գյուղում»

Անի Բալայան․ «Ստեփանակերտից դուրս»

Այսօր Երևանում՝ Թատրոնի և կինոյի պետական ինստիտուտի (ԵԹԿՊԻ) ճեմասրահում, բացվել է Արցախում բնակվող լուսանկարիչներ՝ Արմեն Գաբրիելյանի, Դավիթ Ղահրամանյանի, Դիանա Հակոբյանի, Անի Բալայանի, Էդգար Քամալյանի, Մարգարիտա Պետրոսյանի, Նարե Առուշանյանի լուսանկարների ցուցահանդեսը։

Դավիթ Ղահրամանյան․ «Ձմեռ․ գազ չկա»

Մարգարիտա Պետրոսյան․ «Այսօր էլ այսպես»

«Շրջափակման ձայնը» խորագիրը կրող ցուցահանդեսի գլխավոր նպատակը Արցախի շուրջ ստեղծված իրավիճակը հանրությանը պատկերավոր ներկայացնելն է։

Դավիթ Ղահրամանյան․ «Խաղ լույսի հետ»

Ցուցահանդեսը եռալեզու է, ինչը հնարավորություն կտա լայն լսարան ձևավորել։ Այն կգործի մայիսի 16-18-ը, նախատեսվում են նաև ցուցադրումներ Գյումրի և Վանաձոր քաղաքներում։ Ցուցահանդեսը ԵԹԿՊԻ-ի Ուսանողական գիտական, ստեղծագործական ընկերության նախաձեռնությունն է։

Գլխավոր լուսանկարում՝ Արմեն Գաբրիելյան․ «Սպասում»