Վրաստանի ազգային ավիափոխադրողը՝ Georgian Airways-ը, չեղարկել է Երևանով Թբիլիսիից Մոսկվա տարանցիկ թռիչքները։ Այդ մասին հայտնում է gazeta.ru-ն՝ հղում անելով ավիաընկերությանը։ Մայիսի 16-ից վրացական այս ավիաընկերությունը Մոսկվա ուղիղ թռիչքների տոմսերի վաճառք էր սկսել։

«Այո, մայիսի 20-ից հետո մենք չեղարկել ենք տրանզիտ բոլոր թռիչքները»,- հայտարարել է վրացական ավիափոխադրողի ներկայացուցիչը։ Ընկերությունում նշել են, որ դեռևս չեն որոշել՝ արդյոք վերադարձնելու են առավել ուշ ժամկետների համար ձեռք բերված տոմսերի գումարը։ 

Georgian Airways-ից հայտնել են, որ այժմ կոմերցիոն բաժանմունքը լուծում է հայկական Air Dilijans ավիաընկերության կողմից վաճառված տոմսերի հարցը՝ Երևանով տարանցիկ չվերթների համար։

Հիշեցնենք, որ մայիսի 10-ին Ռուսաստանի նախագահ Վլադիմիր Պուտինը հրամանագիր էր ստորագրել 2023 թվականի մայիսի 15-ից Վրաստանի քաղաքացիների համար Ռուսաստան մուտքի առանց վիզային ռեժիմ սահմանելու մասին։ Մեկ այլ հրամանագրով էլ Պուտինը հանել էր Ռուսաստանից Վրաստան օդային փոխադրումների արգելքը, որը գործում էր 2019 թվականի հունիսից։

Լուսանկարը՝ РИА Новости / Максим Богодвид