Զոհված զինծառայողների ծնողները դադարեցնում են նստացույցը Կառավարության շենքի առջև։ Այս մասին հայտնում է «Որդիների Կանչ» ՀԿ-ն, որի անդամները զոհվածների ծնողներն են։

«Հիմք ընդունելով մեր իրավապաշտպանների որոշումը՝ առ այն, որ հերոսածին Գայանեի պաշտպանության իրավական գործիքակազմը սպառված է, «Որդիների Կանչ» ՀԿ-ն ևս որոշում է կայացրել կասեցնել պայքարի այս ձևը և դադարեցնել մեր նստացույցը։

Շնորհակալ ենք մեր կողմից շատ հարգելի և վստահված փաստաբաններ Վահան Հովհաննիսյանին և Ռուբեն Մելիքյանին։

Տիկին Գայանեի պաշտպանությունը շարունակող մյուս փաստաբաններին ի սրտե մաղթում ենք հաջողություն։ Հայրենակիցնե’ր, Ձեզ ևս անչափ շնորհակալ ենք ամեն-ամեն ինչի համար։ Մեր պայքարը սրանով չի ավարտվում։ Պայքարի ձևն է փոխվում։ Հետագա մեր անելիքների մասին կտեղեկացնենք շուտով»,- նշվում է հայտարարության մեջ։

Նշենք, որ  44-օրյա պատերազմում զոհված զինծառայողների ծնողները 4 օր նստացույց իրականացրին Կառավարության շենքի առջև՝ իրենց աջակցությունը հայտնելով Գայանե Հակոբյանին, որին մեղադրում են Նիկոլ Փաշինյանի որդուն՝ Աշոտ Փաշինյանին, առևանգելու փորձի մեջ։ Դատարանը մայիսի 20-ին որոշել է 1 ամսով կալանավորել զոհված զինծառայողի մորը։ 

Գայանե Հակոբյանի փաստաբաններ Ռուբեն Մելիքյանը, Վահան Հովհաննիսյանը, Վահան Գևորգյանը այսօր հայտնեցին, որ Գայանե Հակոբյանի արդյունավետ պաշտպանության իրավական գործիքակազմն այլևս սպառված է և որոշել են դադարեցնել իրենց մասնակցությունը քրեական վարույթի հետագա ընթացքին։