Ինդոնեզիայի նախագահ Ջոկո Վիդոդոն պաշտպանության նախարար Պրաբովո Սուբիանտոյից նախապես չի ստացել տեղեկատվություն ուկրաինական հակամարտության կարգավորման ինդոնեզական նախագծի վերաբերյալ։ Այդ մասին հայտնել է տեղական The Jakarta Post-ը։

«Առաջարկը եկել է պարոն Պրաբովոյից։ Ես նրա հետ չեմ խոսել։ Ես այսօր երեկոյան կամ վաղը նրան կհրավիրեմ հանդիպման»,- Վիդոդոյի խոսքերը մեջբերել է պարբերականը։ Սպասվում է, որ հանդիպումը նվիրված կլինի ուկրաինական հակամարտության ինդոնեզական պլանի քննարկմանը։ 

Հիշեցնենք, որ հունիսի 3-ին Ինդոնեզիայի պաշտպանության նախարար Պրաբովո Սուբիանտոն անվտանգության հարցերով «Շանգրի-Լա երկխոսություն» համաժողովի ժամանակ, որն ընթանում էր Սինգապուրում, առաջարկել էր Ուկրաինայում պատերազմի խաղաղ կարգավորման սեփական նախագիծը։ 

Ինդոնեզական խաղաղության բանաձևի հիմնական կետերն են.

• երկու կողմերից կրակի անհապաղ դադարեցում,
• ապառազմականացված գոտու ստեղծում։ Յուրաքանչյուր կողմ պետք է իր ընթացիկ դիրքերից հետքաշվի 15 կիլոմետրով,
• այդ գոտում միջազգային խաղաղապահ ուժերի տեղակայում,
• ՄԱԿ-ի միջնորդությամբ «վիճելի տարածքներում» հանրաքվեների անցկացում (թե սրանք կոնկրետ որ տարածքներն են, Սուբիանտոն չի մանրամասնել):

Ինչպես TACC գործակալությանը հայտնել էին Ինդոնեզիայում ՌԴ դեսպանությունից, Մոսկվան գնահատում է Ջակարտայի ջանքերն Ուկրաինայում խաղաղության կարգավորմանը նպաստելու ուղղությամբ։ Կիևը հակառակը քննադատել էր ինդոնեզական կողմի առաջարկը՝ պնդելով, որ երկու երկրների միջև չկան վիճելի տարածքներ։ 

«Իրագործելով ագրեսիվ գործողություն՝ ՌԴ-ն բռնազավթել է Ղրիմը, Դոնեցկի, Լուգանսկի, Զապորոժյեի և Խերսոնի մարզերի հատվածներ։ Դա փաստ է, որը գրանցված է ՄԱԿ-ի պաշտոնական փաստաթղթերում»,- գրել էր Ուկրաինայի ԱԳՆ ներկայացուցիչ Օլեգ Նիկոլենկոն։ Նա նաև հավելել էր, որ երկարաժամկետ խաղաղությունը պետք է ձեռք բերվի միայն Ուկրաինայի տարածքից ռուսական զորքերի ամբողջական դուրսբերման դեպքում։

Լուսանկարը՝ Ուկրաինայի նախագահի մամուլի ծառայության