Ջրականի նորակոչիկների 5-րդ գումարտակի հրամանատար Իշխան Վահանյանի գործով (հայտնի է նաև որպես Խուռհատի գործ, խմբ.) դատական նիստն այսօր հետաձգվեց։ Պատճառն այն էր, որ դատակոչված (դատարան կանչված) անձինք, վկաները առանց հարգելի պատճառների դատարան չեն ներկայացել։

«Բոլորը ծանուցված են, մի մասը հրաժարվում է դատարան ներկայանալ, մի մասը ծանուցագրերը ստանալուց է հրաժարվում»,- հայտնեց դատավոր Ջոն Հայրապետյանը։

Իշխան Վահանյանը մեղադրվում է Խուռհատ սարի վրա պատերազմի ժամանակ նորակոչիկներին միայնակ թողնելու և մարտական դիրքերը լքելու մեջ։ Առաջադրված մեղադրանքը նա չի ընդունում։ 

Գումարտակի զինծառայողները, մնալով առանց հրամանատարի, նահանջել են Հադրութի մոտակայքում գտնվող Խուռհատ սարից։ Նրանց մեծ մասը, չիմանալով, որ Հադրութը գրավված է, գնացել է այդ ուղղությամբ և զոհվել։

Դատարանը չներկայացած անձանց բերման ենթարկելու որոշում կայացրեց։

Տուժողների իրավահաջորդների ներկայացուցիչ Գուրգեն Գրիգորյանը նշեց, որ դատարան ներկայանալուց հրաժարվում է նաև զոհվածների ծնողների մի մասը։ Նա դատարանին խնդրեց, որ ոստիկանությունը ծնողների հանդեպ այլ մոտեցում ցուցաբերի։

Դատական հաջորդ նիստը նշանակվեց հունիսի 14-ին։