Թել Ավիվի Պինխազ Ռոզենի փողոցում տղամարդը միտումնավոր մեքենան վարել է անցորդների ուղղությամբ, իսկ այնուհետև դանակով հարձակվել նրանց վրա։ Այդ մասին գրում է The Jerusalem Post-ը։ Նշվում է առնվազն 8 տուժածի մասին։

Նրանցից մեկը 46-ամյա կին է։ Բժիշկները նրա վիճակը գնահատում են ծանր։ Երկու տուժած, որոնք տեղափոխվել են հիվանդանոց, ստացել են միջին ծանրության վնասվածքներ։

Հարձակում գործած անձը սպանվել է ականատեսներից մեկի կողմից։ Ինչպես փոխանցում են իսրայելական լրատվամիջոցները, հարձակում գործած անձը 23-ամյա Հասին Իսան էր, որը Հորդանան գետի արևմտյան ափի բնակիչ էր։ Ըստ իսրայելական կողմի՝ պաղեստինցին սահմանը հատելիս նշել էր, որ բուժման կարիք ունի։

תיעוד הפיגוע בתל אביב: דורס, יוצא דרך חלון הרכב ומתחיל במסע דקירות pic.twitter.com/hWehOrdkMJ

— כאן חדשות (@kann_news) July 4, 2023

Պաղեստինյան իսլամիստական ՀԱՄԱՍ շարժումը Թել Ավիվում այս հարձակումն անվանել է Հորդանան գետի արևմտյան ափին գտնվող Ջենինում «հանցագործության առաջին պատասխանը», որտեղ Իսրայելի պաշտպանության բանակը հուլիսի 3-ի գիշերը սկսել էր զանգվածային գործողություն։

Ջենինում գտնվում է փախստականների խոշոր ճամբար, որն իսրայելցի զինվորականները համարում են «ահաբեկիչների ապաստարան»։ 

Իսրայելական լրատվամիջոցների փոխանցմամբ՝ Ջենինում գործողությունը դարձել է վերջին 20 տարիներին ամենախոշորը։ Պաղեստինյան ՖԱԹՀ, ՀԱՄԱՍ և «Իսլամական ջիհադ» կազմակերպությունները հայտարարություն են տարածել, որտեղ դատապարտել են Ջենինում տեղի ունեցածը և կոչ արել դիմադրության։

Լուսանկարը՝ Miriam Alster/Flash90