«Միակ միջազգային ներկայացուցչությունը, որն այսօր ունենք Արցախում, Կարմիր խաչի միջազգային կոմիտեն է, որը քիչ թե շատ իր չեզոքության, անկախության սկզբունքները միշտ պահպանելով՝ փորձում է հումանիտար իրավիճակին գոնե ինչ-որ ձևով օգտակար լինել և հարցերը կարգավորել։ Ադրբեջանը ցանկացած առիթ օգտագործելու է Կարմիր խաչին Արցախից հանելու համար»,- այսօր կայացած հեռուստակամրջի ընթացքում հայտնեց Արցախի մարդու իրավունքների պաշտպան Գեղամ Ստեփանյանը։

Վերջինս նշեց, որ Արցախի շրջափակման 7 ամսվա ընթացքում Արցախի ժողովրդի համար սպառնալիքներն այսքան վառ արտահայտված չեն եղել, որքան հիմա։

«7 ամիս շարունակ լինելով շրջափակման մեջ՝ Արցախի ժողովուրդն իրապես գտնվում է գոյաբանական սպառնալիքի տակ»,- ասաց Ստեփանյանը։ Ապա հավելեց՝ կցանկանար, որ Հայաստանի Հանրապետության հասարակությունը հասկանա, թե ինչ իրավիճակ է այսօր Արցախում։

«Իրավիճակի լրջությունն ու այն սպառնալիքը, որն այսօր կախված է Արցախում ապրող մարդու գլխին, անգամ Հայաստանի հասարակության մեջ ամբոողջական չի ընկալվել։ Այն հանդարտությունն ու արձագանքը, որ կա Հայաստանում, երբեմն՝ նաև հայկական սփյուռքում, Արցախի ժողովրդի ճակատագրի վերաբերյալ, ինձ համար անընդունելի է»,- նշեց Գեղամ Ստեփանյանը։

ՄԻՊ-ի խոսքով, ցանկալի կլիներ, որ Հայաստանի Հանրապետության հանրային իշխանությունը ներկայացնող կառույցներից այնպիսի հայտարարություններ չհնչեն, որոնք Արցախին վնաս են հասցնում։ «Պետք է ձեռնպահ մնալ այնպիսի հայտարարություններից, որոնք չեն բխում Արցախի ժողովրդի շահերից և կասկածի տակ են դնում Արցախի ժողովրդի ինքնորոշման իրավունքը, որը տվյալ դեպքում հավասարազոր է Արցախի ժողովրդի կյանքի իրավունքին»,- նշեց նա։