ԱԺ ՀԱԿ խմբակցության քարտուղար Արամ Մանուկյանը ԱԺ ամբիոնից հայտարարեց, թե երեկ կառավարության հնգամյա ծրագրի քննարկման ժամանակ իրենից ընդամենը մեկ րոպե պահանջվեց, որպեսզի վարչապետ Տիգրան Սարգսյանը երեք սխալ թույլ տար:

Արամ Մանուկյանը բավականին կոշտ ելույթով ներկայացրեց վիճակագրական թվեր արտագաղթի, օրենսդրական նախաձեռնությունների եւ այլ ոլորտների վերաբերյալ, ինչը զայրացրեց եւ հունից հանեց որոշ հանրապետական պատգամավորների: Նրանք տեղից միջամտում եւ տարբեր ռեպլիկներով փորձում էին խանգարել ընդդիմադիր պատգամավորի ելույթը, սակայն Հովիկ Աբրահամյանը միջամտեց:

Այնուհետեւ լեզվակռիվ սկսվեց նաեւ ԱԺ նախագահի եւ ՀԱԿ խմբակցության քարտուղարի միջեւ: Քանի որ իր ելույթի ժամանակ պատգամավորները խանգարել էին իրեն, Արամ Մանուկյանն այն ավարտելու համար 1-2 րոպե ժամանակ խնդրեց, ինչը դուր չեկավ Հովիկ Աբրահամյանին. «Դուք չեք որոշում, թե երբ ավարտեք ելույթը, մի խախտեք կանոնակարգ օրենքը»,-ասաց ԱԺ նախագահը' նշելով, որ ինքը միջամտել է, երբ խանգարել են պատգամավորին: