«Հետքը» շարունակում է բարձրաստիճան պաշտոնյաների գույքի և եկամուտների հայտարարագրերի մասին հրապարակումները։ Այս հոդվածում կներկայացնենք, թե 2022 թվականի ընթացքում ինչ ունեցվածք են հայտարարագրել Հայաստանի 10 մարզերի դատախազությունների ղեկավարները։

Նախկին մարզպետի որդին հայտարարագրել է 8 միավոր անշարժ գույք

Մարզերի դատախազների մեջ ամենից շատ անշարժ գույքը հայտարարագրել է Սյունիքի մարզի դատախազ Մասիս Պողոսյանը, որը Սյունիքի նախկին մարզպետ Մելիքսեթ Պողոսյանի որդին է։ 

Դատախազ Մասիս Պողոսյանը հայտարարագրել է 8 միավոր անշարժ գույք, որոնք նրան պատկանում են համատեղ սեփականության իրավունքով։ Անշարժ գույքերից 5 միավորը հողամասեր են, որոնք բոլորն էլ գտնվում են Սյունիքի մարզի Տեղ գյուղում։ Բացի դրանցից, Մասիս Պողոսյանը հայտարարգրել է նաև անհատական բնակելի տուն Գորիս քաղաքում և երկու բնակարան՝ մեկը Երևանի Մալաթիա-Սեբաստիա վարչական շրջանում, իսկ մյուսը՝ Քանաքեռ-Զեյթունում։

Մասիս Պողոսյանը Սյունիքի մարզի դատախազի պաշտոնը զբաղեցնում է 2022 թվականի սեպտեմբերի 9-ից։ Բոլոր անշարժ գույքերը նա ձեռք է բերել նախքան այդ պաշտոնին նշանակվելը։

Անշարժ գույքերի մեծ քանակով Մասիս Պողոսյանին հաջորդում է Արագածոտնի մարզի դատախազ Գագիկ Մարգարյանը, որը հայտարարագրել է 6 միավոր անշարժ գույք։ Այս բոլոր գույքերը գտնվում են Երևանի Շենգավիթ վարչական շրջանում։ Գույքերից 3-ը բնակարաններ են, որոնցից 1-ը նրան է պատկանում միանձնյա, իսկ 2-ը բաժնային սեփականության իրավունքով։ Մյուս 2 գույքերը հասարակական նշանակության շինություններ են, իսկ մյուսն էլ՝ հողամաս։ 

Բաժնային սեփականության իրավունքով Գագիկ Մարգարյանին պատկանող բնակարանները նա ժառանգություն է ստացել 2022 թվականի ընթացքում։ Արագածոտնի մարզի դատախազի պաշտոնը նա ստանձնել է 2021 թվականի հունվարի 27-ին։

Կոտայքի մարզի դատախազ Սևակ Պողոսյանն ու Շիրակի դատախազ Արմեն Չիչոյանն էլ հայտարարագրել են 4-ական անշարժ գույք։ Սևակ Պողոսյանն ունի 1 բնակարան Երևանի Կենտրոն վարչական շրջանում, 2 հողամաս՝ Կոտայքի մարզի Առինջ գյուղում, և 1 բնակելի տուն կրկին Առինջում, որը նա գնել է 2022 թվականին։ Սևակ Պողոսյանը Կոտայքի մարզի դատախազ է նշանակվել մոտ մեկ ամիս առաջ՝ 2023թ․ հունիսի 13-ին։ Մինչ այդ նա զբաղեցնում էր Էրեբունի և Նուբարաշեն վարչական շրջանների դատախազի տեղակալի պաշտոնը։

Շիրակի մարզի դատախազ Արմեն Չիչոյանը հայտարարագրել է 3 բնակարան, որոնցից 1-ը Գեղարքունիքի մարզկենտրոն Գավառ քաղաքում է, իսկ մյուսները գտնվում են Երևանի Ավան և Արաբկիր վարչական շրջաններում։ Բացի այս բնակարաններից Չիչոյանը հայտարարագրել է նաև 1 հողամաս Գեղարքունիքի մարզի Շորժա գյուղում։ Արմեն Չիչոյանը Շիրակի մարզի դատախազի պաշտոնը ստանձնել է 2022թ․ հոկտեմբերի 22-ին։

Արագածոտնի մարզի դատախազի դրամական միջոցները կազմում են 70 մլն դրամ

Դրամական միջոցների տեսանկյունից իրեն հավասարը չունի Արագածոտնի մարզի դատախազ Գագիկ Մարգարյանը։ Վերջինս կանխիկ եղանակով հայտարարագրել է 48 միլիոն դրամ, 25 հազար դոլար և 30 հազար եվրո։ Ի դեպ, տարեսկզբին Մարգարյանի դրամական միջոցները դրամով կազմել են 72 միլիոն դրամ։ Նրա ծախսերի հայտարարագրում տեսնում ենք, որ այդ գումարից 23 միլիոն դրամ Մարգարյանը ծախսել է անշարժ գույքի վերանորոգման համար։ Ի տարբերություն կանխիկ միջոցների, Գագիկ Մարգարյանը չի սիրում բանկային հաշիվներին շատ գումար պահել, նա հայտարարագրել է ընդամենը 174 հազար դրամ։

Այս բաժնում Գագիկ Մարգարյանին հաջորդում է Շիրակի մարզպետ Արմեն Չիչոյանը։ 2022-ի տարեվերջում նա իր բանկային հաշիվներում ունեցել է 5 հազար դոլար և 4,7 մլն դրամ։ Իսկ կանխիկ եղանակով Շիրակի դատախազը հայտարարագրել է 25 հազար դոլար և 13,6 միլիոն դրամ։

Դրամական միջոցների եռյակը եզրափակում է Տավուշի մարզի դատախազ Գոռ Ալոյանը։ Նա հայտարարագրել է կանխիկ 9 մլն դրամ, 10 հազար եվրո և 5 հազար դոլար, իսկ անկանխիկ եղանակով՝ ընդամենը 500 հազար դրամ։ Գոռ Ալոյանը Տավուշի դատախազի պաշտոնը զբաղեցնում է 2021թ․ մայիսի 20-ից։ 

Ամենահամեստ դրամական միջոցներին տիրապետում է Արմավիրի մարզի դատախազ Վահան Սարգսյանը։ Նա հայտարարագրել է ընդամենը 2 միլիոն դրամ կանխիկ գումար։

Ամենաեկամտաբեր տարին ունեցել է Արարատի մարզի դատախազը

2022 թվականը ամենաեկամտաբերը եղել է Արարատի մարզի դատախազ Ռաֆայել Մանուկյանի համար։ Նախորդ տարի նրա եկամուտները կազմել են 59 մլն դրամ։ Սակայն հարկ է նշել, որ այդ գումարից 39,5 միլիոն դրամը «Բիբլոս բանկից» ստացված վարկերն են։ 9,5 միլիոն դրամը Ռաֆայել Մանուկյանի աշխատավարձն է։ 8 միլիոն դրամ նա ստացել է իր Mazda մակնիշի ավտոմեքենայի վաճառքից, իսկ մնացած 2 միլիոնը ձևակերպված է որպես այլ եկամուտ։ Ռաֆայել Մանուկյանը Արարատի մարզի դատախազի պաշտոնը զբաղեցնում է 2022թ․ նոյեմբերի 23-ից։ 

Այս շարքում երկրորդ հորիզոնականը զբաղեցնում է Արագածոտնի մարզի դատախազ Գագիկ Մարգարյանը, որի եկամուտները 2022 թվականին կազմել են 23,9 մլն դրամ։ Այդ գումարից 9,5 միլիոնը նրա աշխատավարձն է, 2 միլիոնը՝ «Ամերիաբանկից» ստացված վարկ։ 6,9 միլիոն դրամ եկամուտ նա ստացել է վարձակալության վճարներից, իսկ մնացած 5,5 մլն դրամը Գագիկ Մարգարյանը ստացել է իր Mercedes մակնիշի ավտոմեքենայի վաճառքից։ 

Եռյակն էլ եզրափակում է Լոռու մարզի դատախազ Արմեն Շահբազյանը, որի եկամուտները 2022 թվականի ընթացքում կազմել են 16,2 մլն դրամ, որից 8,2 մլն դրամը Շահբազյանի աշխատավարձն է, իսկ մնացած 8 մլն դրամը գույքի վաճառքից ստացված եկամուտն է։ Արմեն Շահբազյանը Լոռու մարզի դատախազ է նշանակվել է 2023 թվականի հունվարի 30-ին։ Մինչ այդ նա զբաղեցնում էր Գլխավոր դատախազության մարդու դեմ ուղղված հանցագործությունների գործերով վարչության ավագ դատախազի պաշտոնը։

Ինչ վերաբերում է տրանսպորտային միջոցներին, ապա ամենաթանկարժեք ավտոմեքենան հայտարարագրել է Կոտայքի մարզի դատախազ Սևակ Պողոսյանը։ Նա 2022 թվականին «ՌՍ Ավտո» ՍՊԸ-ից 15,7 միլիոն դրամով գնել է 2016 թվականի արտադրության Lexus մակնիշի ավտոմեքենա։ 

***

«Հետքը» շարունակում է ուսումնասիրել բարձրաստիճան պաշտոնյաների հայտարարագրերը։ Առաջիկայում հայտարարագրերի վերաբերյալ նոր հրապարակումներ կունենանք։

Նկարը՝ Արեն Նազարյանի, Հետք Մեդիա գործարան