Եթե Նիկոլ Փաշինյանն իր տրամադրության տակ ունենա աշխարհի ամենաուժեղ բանակը, ապա այդ դեպքում կպարտվեր նույնիսկ Ադրբեջանին։ «Հետքին» տված հարցազրույցում այսպիսի կարծիք հայտնեց պետական կառավարման մասնագետ Հովհաննես Ավետիսյանը։ Նրա խոսքով՝ 44-օրյա պատերազմից մեկ տարի անց ադրբեջանական բանակը ուշքի եկավ, և սկսեց գրավել Հայաստանի Հանրապետության սուվերեն տարածքները, մինչդեռ դա կարող էր կանխվել, եթե մեր իշխանությունները գիտակցում և ցանկություն ունենային սահմանները ամրացնելու համար։

«Այս պահի դրությամբ ամենամեծ թալանչին հենց Փաշինյանն է, քանի որ թալանում է պետությունը՝ զրկելով հայրենիքի տարբեր մասերից, թալանում է մեր ժողովրդին, քանի որ ամենամեծ թալանը մարդկանց հայրենիքից զրկելն է և մեզ պատկանող տարածքները թշնամուն կամավոր հանձնելը»,- ասում է Հովհաննես Ավետիսյանը՝ շեշտելով, որ Փաշինյանը կամավոր հրաժարական չի տալու, այդ պատճառով քաղաքական դաշտի դերակատարները պետք է ձևավորեն օրակարգ և նրան հեռացնեն իշխանությունից։ 

Հովհաննես Ավետիսյանի խոսքով՝ վերջին երկու տարիների ընթացքում Ադրբեջանը հասցրել է զենք-զինամթերք և զորք կուտակել նոր պատերազմ սկսելու համար, և ըստ փորձագետի՝ նրանք պատրաստվում են նոր պատերազմի։ «Հիմա քանի որ Հայաստանում նրանց շահերի պաշտպանը Նիկոլ Փաշինյանն է, նրա հեռացումը, նույնիսկ հեռացման իրողությունը նրանց նոր պատերազմի հիմք է տալու»,- նշում է Հովհաննես Ավետիսյանը։

Հարցազրույցն ամբողջությամբ դիտե՛ք տեսանյութում։