Երևան համայնքը մոտ 1 միլիարդ դրամի վնաս է կրել՝ մայթերին տեղադրված տերմինալների զբաղեցրած տարածքի համար վարձավճար չստանալով։ Այս հաշվարկն արվել է Գլխավոր դատախազության պետական շահերի պաշտպանության վարչությունում՝ «Հետքի» հոդվածից հետո սկսված ուսումնասիրության շրջանակում։ Ուսումնասիրությունն իրականացրած ավագ դատախազ Աղավնի Մադոյանը հայտնեց, որ 4 ամիս տևած ուսումնասիրության արդյունքում քրեական վարույթ է նախաձեռնվել։

• Երևանի մայթերին տերմինալներն ապօրինի են տեղադրված․ համայնքը զրկվում է միլիոնավոր դրամների մուտքերից

Երևան համայնքի մայթերին, այսինքն՝ համայնքային սեփականություն հանդիսացող հողամասերի վրա առանց որևէ հիմքի 1296 տերմինալ է տեղադրված: Նախնական հաշվարկով՝  Երեւան համայնքը 926 միլիոն 588 հազար 160 դրամի վնաս է կրել։

2022 թ.-ին «Հետք»-ն ուսումնասիրել էր Երևան քաղաքում վճարային տերմինալների տեղադրման օրինականությունը, տեղադրման հիմքերը և պարզել, որ մի շարք ընկերություններ տնտեսական գործունեության նպատակով օգտագործում են մայթերը, գետնանցումները, հանրային այլ տարածքներ, սակայն Երևան քաղաքին վարձավճար չեն տալիս (բացառությամբ մեկից՝ այն էլ որոշ վերապահումներով):

Ստորեւ՝ «Հետքի» հարցազրույցը գլխավոր դատախազության պետական շահերի պաշտպանության վարչության ավագ դատախազ Աղավնի Մադոյանի հետ ուսումնասիրության արդյունքների վերաբերյալ։