Բաքուն ուժ չի կիրառի Հայաստանի տարածքով դեպի Նախիջևան ցամաքային միջանցքի բացման համար։ Նման հայտարարությամբ հանդես է եկել Ադրբեջանի նախագահի արտաքին քաղաքական հարցերով խորհրդական Հիքմեթ Հաջիևը՝ Reuters գործակալության հետ զրույցում։

Հաջիևի խոսքով՝ Ադրբեջանը ձգտում է Հայաստանի տարածքով դեպի Նախիջևան բացել տրանսպորտային հաղորդակցություն, որը, ըստ նրա, «օգուտ կբերի ինչպես երկու երկրներին, այնպես էլ տարածաշրջանին»։

«Ադրբեջանը որևէ ռազմական նպատակ կամ խնդիր չունի Հայաստանի ինքնիշխան տարածքում, դա <...> Ադրբեջանի օրակարգից դուրս է»,- հայտարարել է Հաջիևը։

Ադրբեջանի նախագահի խորհրդականն ընդգծել է, որ Բաքուն ցանկանում է «բացառապես խաղաղ ճանապարհով» Երևանի հետ լուծել իր բոլոր խնդիրները, որոնք կապված են տրանսպորտային ու հաղորդակցային գծերի հետ։

«Հայաստանին մեր առաջարկը հաղորդակցային ու տրանսպորտային գծերի կառուցումն է` շատ խաղաղ ճանապարհով»,- Բրյուսելում ՀՀ ԱԽ քարտուղար Արմեն Գրիգորյանի և եվրոպացի դիվանագետների հետ հանդիպումից հետո նշել է ադրբեջանցի պաշտոնյան։

Հիշեցնենք, որ նախօրեին Բրյուսելում Գրիգորյանն ու Հաջիևը հանդիպել էին Ֆրանսիայի, Գերմանիայի ու ԵՄ-ի բարձրաստիճան դիվանագետների հետ։ Նրանց ավելի ուշ միացել էր նաև Եվրոպական խորհրդի նախագահ Շառլ Միշելը։ Քննարկման հիմնական թեման եղել է հոկտեմբերի 5-ին Իսպանիայի Գրանադա քաղաքում, Եվրոպական քաղաքական համայնքի III գագաթնաժողովի շրջանակներում, Նիկոլ Փաշինյանի և Իլհամ Ալիևի հնարավոր հանդիպման կազմակերպումը։ Նախատեսված է, որ դրան կմասնակցեն նաև Ֆրանսիայի նախագահ Էմանուել Մակրոնը, Գերմանիայի կանցլեր Օլաֆ Շոլցը և Եվրոպական խորհրդի նախագահ Շառլ Միշելը։

Լուսանկարը՝ APA գործակալության