Ֆրանսիայի նախագահ Էմանուել Մակրոնը կարծում է, որ Լեռնային Ղարաբաղում առկա իրավիճակի պատճառով Ադրբեջանի դեմ պատժամիջոցների սահմանումը ներկայում արդյունավետ չի լինի:

«Հիմա պատժամիջոցների ժամանակը չէ։ Դրանք անարդյունավետ կլինեին և կխանգարեին լավագույնս պաշտպանել Հայաստանի տարածքը և նրա բնակչությունը։ Այժմ պահանջատիրության, հստակության, պարտավորությունների, մասնավորապես՝ Ֆրանսիայի ընտրած տարբերակի՝ ռազմական աջակցության ժամանակն է։ Բայց պատժամիջոցների ժամանակը չէ, քանի որ մենք պետք է շարունակենք երկխոսել Ադրբեջանի հետ»,- Գրանադայում Եվրոպական քաղաքական համայնքի III գագաթնաժողովի արդյունքների ամփոփման ժամանակ հայտարարել է Ֆրանսիայի առաջնորդը։

EN DIRECT | Conférence de presse du Président @EmmanuelMacron à l’issue du Sommet de la Communauté politique européenne. https://t.co/an0ipXqIIY

— Élysée (@Elysee) October 5, 2023

Նրա խոսքով՝ Ֆրանսիան ամեն ինչ անում է Հայաստանին աջակցելու համար, այդ թվում՝ Լեռնային Ղարաբաղի բնակչության համար։ «Այժմ գլխավորը Ղարաբաղից ընտանիքների հետ կապված իրավիճակն է և սահմանի հարցը», - հայտարարել է Ֆրանսիայի նախագահ Մակրոնը՝ հավելելով, որ «անհրաժեշտ է աջակցել հայկական իշխանություններին՝ տարածաշրջանում որևէ ապակայունացումից խուսափելու համար»:

Հիշեցնենք, որ նախօրեին Ստրասբուրգում Եվրոպական խորհրդարանի լիագումար նիստի ժամանակ ընդունվել էր «ԵՄ-ի և Ադրբեջանի միջև հարաբերությունների վերանայման ու Լեռնային Ղարաբաղում իրավիճակի հետ կապված պատժամիջոցների սահմանման անհրաժեշտության մասին» բանաձևը: Փաստաթղթին աջակցել էր 491 պատգամավոր, դեմ հանդես եկել 9-ը։ 36 պատգամավոր էլ ձեռնպահ էր մնացել։

Հայտարարության մեջ ընդգծվում էր, որ Լեռնային Ղարաբաղի վրա Ադրբեջանի հարձակումը եղել է «անհիմն և նախապես պլանավորված»։ Խորհրդարանականների կարծիքով՝ տեղի ունեցածը միջազգային իրավունքի ու մարդու իրավունքների կոպիտ խախտում է։ Նրանք Լեռնային Ղարաբաղից հայերի զանգվածաբար դուրս գալն անվանել են էթնիկ զտում։

«Եվրոպական խորհրդարանը կոչ է անում ամբողջությամբ վերանայել Ադրբեջանի հետ ԵՄ հարաբերությունները՝ հաշվի առնելով վերջին իրադարձությունները և այդ երկրում մարդու իրավունքների հետ կապված իրավիճակի վատթարացումը»,- ասված էր բանաձևում։ 

Լուսանկարը՝ Thomas Coex/AFP