Իսրայելում զարգացումների հետևանքով տուժածների շրջանում հայերի առկայության մասին տեղեկություններ այս պահին չկան: Հայտնում է Հայաստանի արտգործնախարարության մամուլի խոսնակ Անի Բադալյանը։

«ՀՀ ԱԳՆ, Իսրայելում դեսպանության միջոցով, մշտական կապի մեջ է տեղի իշխանությունների, հայկական կազմակերպությունների և անհատների հետ: Ըստ անհրաժեշտության, կտրամադրենք լրացուցիչ տեղեկատվություն»,- ֆեյսբուքյան էջում գրել է ԱԳՆ մամուլի խոսնակը:

Հիշեցնենք, որ Իսրայելի պաշտպանության բանակի մամուլի ծառայության փոխանցմամբ՝ հոկտեմբերի 7-ի առավոտյան Իսրայելը Գազայի հատվածի տարածքից ենթարկվել է զանգվածային հրթիռակոծության։ Տագնապի ազդանշանները միացվել են երկրի մի շարք քաղաքներում, այդ թվում՝ Թել Ավիվում և Երուսաղեմում։ Իսրայելական ու պաղեստինյան աղբյուրները հայտնում են զոհերի և վիրավորների մասին։