Ռուսաստանը պատրաստ է աջակցել Հայաստանի և Ադրբեջանի միջև խաղաղության պայմանագրի ստորագրմանը ու Մոսկվայում ընդունել այդ բանակցությունները։ Այդ մասին ТАСС գործակալության փոխանցմամբ Բիշքեկում ԱՊՀ երկրների ղեկավարների խորհրդի հանդիպման ժամանակ հայտարարել է Ռուսաստանի նախագահ Վլադիմիր Պուտինը։

«Օրակարգում դրված է (հայ-ադրբեջանական, խմբ.) խաղաղության պայմանագրի նախապատրաստումը, որպեսզի վերջնականապես վերջակետ դրվի այս երկարատև հակամարտությանը։ Ռուսական կողմը, անշուշտ, պատրաստ է մեր գործընկերներին ցուցաբերել համակողմանի աջակցություն»,- ասել է Ռուսաստանի նախագահը։

Նրա խոսքով՝ Մոսկվան պատրաստ է, ցանկացած ձևաչափով, կազմակերպել և ընդունել այդ բանակցությունները։ Պուտինը նշել է, որ խոսքը գնում է նաև Հայաստանի ու Ադրբեջանի արտաքին գործերի նախարարների բանակցությունների ու փորձագետների հանդիպումների մասին։ «Իհարկե, կնպաստենք, որ այդ բանակցություններն ավարտվեն խաղաղության համաձայնագրի ձեռքբերմամբ, որը կստորագրեն այդ երկրների ղեկավարները»,- ընդգծել է Պուտինը։

«Կրկնում եմ՝ ընտրություն կատարողը միշտ համապատասխան երկիրն է։ Մենք պատրաստ ենք ստեղծել անհրաժեշտ պայմաններն այդ աշխատանքի համար»,- հավելել է նա։

Պուտինը նաև ուշադրություն է հրավիրել այն հանգամանքի վրա, որ վերջին 3 տարվա ընթացքում «ռուսական կողմը զգալի ջանքեր է գործադրել Լեռնային Ղարաբաղում հակամարտության էսկալացիան և ռազմական գործողությունների դադարեցումը թույլ չտալու համար»: «Այս ամբողջ ընթացքում Ռուսաստան-Ադրբեջան-Հայաստան եռակողմ ձևաչափով տքնաջան աշխատանք է տարվել՝ ուղղված երկու մայրաքաղաքների՝ Բաքվի և Երևանի միջև հարաբերությունների կարգավորմանը»,- նշել Է ՌԴ նախագահը: Բացի այդ, ըստ նրա, ռուս խաղաղապահներն իրենց լիազորությունների շրջանակում «բարեխղճորեն կատարել են իրենց առաքելությունը»։

Լուսանկարը՝ Спутник գործակալության