Ֆրանսիայի նախագահ Էմանուել Մակրոնն առաջարկել է «ՀԱՄԱՍ»-ի դեմ գործի դնել միջազգային կոալիցիան, որը պայքար է մղում «Իսլամական պետություն» ահաբեկչական կազմակերպության դեմ: Այդ մասին նա նշել է Երուսաղեմում Իսրայելի վարչապետ Բենյամին Նեթանյահուի հետ հանդիպման ժամանակ։

Ֆրանսիայի նախագահն ասել է, որ Իսրայել է ժամանել՝ իր աջակցությունն և համերաշխությունը իսրայելական ժողովրդին ցուցաբերելու համար: Մակրոնը նշել է, որ Ֆրանսիայի 30 քաղաքացիներ սպանվել են «ՀԱՄԱՍ» արմատական խմբավորման զինյալների կողմից:

🚨 WATCH- French President Macron to Netanyahu:

"This battle should be without mercy, but we are democracies fighting against terrorists. We are working with Israel on the release of the abductees. Everyone should be free - no exceptions."

Source: Channel 11 Reports pic.twitter.com/UQojxphK7W

— Mario Nawfal (@MarioNawfal) October 24, 2023

Ելիսեյան պալատի ղեկավարը նշել է, որ Ֆրանսիան պատրաստ է կոալիցիայի շրջանակներում պայքարել «ՀԱՄԱՍ»-ի դեմ, եթե Իսրայելը նման ցանկություն հայտնի: «Շատ բան կախված կլինի բանակցություններից, որոնք մենք կանցկացնենք մեր դաշնակիցների հետ»,- հավելել է Մակրոնը։

Իր հերթին Իսրայելի վարչապետ Բենյամին Նեթանյահուն նշել է. «Հոկտեմբերի 7-ի ողբերգությունը Հոլոքոստից ի վեր հակասեմական բռնության ամենավատ գործողությունն է: <...> ինչպես հրեաներին գնդակահարեցին Բաբի Յառում, այնպես էլ «ՀԱՄԱՍ»-ը սպանեց, գլխատեց, ողջ-ողջ այրեց նորածիններին, բռնաբարեց և առևանգեց: Նրանց մոտ կա առնվազն 200 պատանդ՝ նորածիններ, երեխաներ, ծերեր և նրանք, որոնք վերապրել են Հոլոքոստը: Այժմ պատերազմ է ընթանում բարբարոսության և քաղաքակրթության միջև»։

Հոկտեմբերի 19-ին Իսրայելում էր Մեծ Բրիտանիայի վարչապետ Ռիշի Սունաքը: Երեկ նա բրիտանական խորհրդարանի պատգամավորներին հայտարարել է, որ, ելնելով առկա հետախուզական տվյալներից, Գազայի հատվածի Ալ-Ահլի հիվանդանոցի շրջանում տեղի ունեցած պայթյունը «հավանաբար առաջացել է Գազայից Իսրայելի ուղղությամբ արձակված հրթիռից»: Նման հայտարարությամբ ավելի վաղ հանդես էր եկել նաև ԱՄՆ նախագահ Ջո Բայդենը։ Նա հոկտեմբերի 18-ին այցելել է Իսրայել:

Լուսանկարը՝ Christophe Ena / POOL / AFP