Իսրայելի վարչապետ Բենյամին Նեթանյահուն լիբանանյան Հեզբոլահ շարժմանը կրկին զգուշացրել է չմտնել Իսրայելի դեմ պատերազմի մեջ: Նա սպառնացել է, որ դա կհանգեցնի Լիբանանի կործանմանը:

«Մենք հյուսիսում և հարավում կվերականգնենք անվտանգությունը: Եթե Հեզբոլահը սխալվի և լայնամասշտաբ պատերազմի մեջ մտնի, ապա իր ձեռքերով կոչնչացնի Լիբանանը»,- մամուլի ասուլիսի ժամանակ հայտարարել է Իսրայելի վարչապետը։

Ինչպես հայտնել է Իսրայելի վարչապետը, ՑԱԽԱԼ-ը (Իսրայելի պաշտպանության բանակ-խմբ.) հյուսիսում մշտապես գործում է Հեզբոլահի դեմ։ Նեթանյահուն հայտարարել է, որ բանակը «ոչնչացնում է ահաբեկչական ջոկատները, նրանց ավելի հեռու է մղում սահմանից, ոչնչացնում է սպառազինությունը»: Նա խոստացել է շարունակել զսպել Հեզբոլահին՝ Գազայի հատվածում իրականացվող ռազմական գործողությունների ժամանակ:

Գազայի հատվածում Իսրայելի դեմ պատերազմում Հեզբոլահը աջակցում է ՀԱՄԱՍ-ին: Իսրայելի պաշտպանության նախարար Յոավ Գալանտի խոսքով՝ հակամարտության վերսկսումից ի վեր Լիբանանի տարածքից Իսրայելի ուղղությամբ արձակվել է ավելի քան 1000 հրթիռ։ ՑԱԽԱԼ-ը պատասխան հարվածներ է հասցրել։

Դեկտեմբերի 1-ին Գազայի հատվածում դադարել էր գործել Իսրայելի և ՀԱՄԱՍ-ի միջև զինադադարը, որը սկսել էր գործել նոյեմբերի 24-ից: Կողմերը միմյանց մեղադրել էին պայմանավորվածությունները խախտելու մեջ։ 

Լուսանկարը՝ Amos Ben Gershom/GPO