Այսօր Արմավիր համայնքի ավագանին արտահերթ նիստ էր հրավիրել՝ համայնքի ղեկավարի արտահերթ ընտրություն անցկացնելու օրակարգով:

Հիշեցնենք, որ Կառավարության հունվարի 11-ի որոշմամբ Արմավիրի համայնքապետ Դավիթ Խուդաթյանը նշանակվել էր Արմավիրի մարզպետ: Դրանից օրեր առաջ՝ հունվարի 5-ին, աշխատանքից ազատվել էր Արմավիրի մարզպետ Էդվարդ Հովհաննիսյանը: 

Այսօրվա ավագանու նիստին մասնակցում էին ավագանու 27 անդամներից 23-ը։ Նիստին մասնակցող ավագանու բոլոր անդամները՝ 23 կողմ, 0 դեմ ձայներով համայնքի ղեկավար ընտրեցին մինչ այդ համայնքի ղեկավարի առաջին տեղակալ Վարշամ Սարգսյանին:

Հարկ է նշել, որ Արմավիր համայնքն ամբողջությամբ ղեկավարվում է «Քաղաքացիական պայմանագիր» կուսակցության կողմից: 2021թ. դեկտեմբերի 5-ի՝ ՏԻՄ ընտրությունների ժամանակ, Արմավիր խոշորացված համայնքում առաջադրվել էր միայն ՔՊ կուսակցությունը: Վերջինս էլ 99,99%-ով ստանձնեց համայնքի իշխանությունը:

Արմավիր համայնքի նորընտիր ղեկավար Վարշամ Սարգսյանը լիազորությունները կստանձնի հունվարի 18-ին։