Մի քանի ժամ առաջ հայտնի դարձավ, որ Յամալ-Նենեցական ինքնավար օկրուգի N3 ուղղիչ գաղութում մահացել է ռուս ընդդիմադիր քաղաքական գործիչ Ալեքսեյ Նավալնին։ Այս լուրը համաշխարհային մամուլի առաջին էջերում է։ Նավալնու մահը մեկնաբանում են նաև համաշխարհային առաջնորդները՝ տեղի ունեցածի մեջ մեղադրելով Ռուսաստանի նախագահ Վլադիմիր Պուտինին և ռուսական իշխանության մյուս ներկայացուցիչներին։

Այսպես, Ուկրաինայի նախագահ Վլադիմիր Զելենսկին հայտարարել է, որ Ալեքսեյ Նավալնին «սպանվել է Պուտինի կողմից»:

«Քիչ առաջ հայտնի դարձավ, որ ռուսական բանտում մահացել է Ալեքսեյ Նավալնին: Ակնհայտ է, որ նա սպանվել է Պուտինի կողմից, ինչպես հազարավոր ուրիշներ, որոնք խոշտանգվել են միայն մեկ արարածի պատճառով: Պուտինի համար միևնույն է, թե ով կմահանա, միայն թե նա պահպանի իր դիրքերը»,- հայտարարել է Ուկրաինայի առաջնորդը։

Արտասահմանյան առաջնորդներից Լատվիայի նախագահ Էդգար Ռինկևիչն առաջինն է մեկնաբանել Ալեքսեյ Նավալնու մահը։

«Ինչ էլ որ մտածեք Ալեքսեյ Նավալնիի մասին՝ որպես քաղաքական գործչի, նա պարզապես դաժանորեն սպանվեց Կրեմլի կողմից: Դա փաստ է, և դա այն է, ինչ պետք է իմանալ ներկայիս ռուսական ռեժիմի իրական բնույթի մասին: Ցավակցում եմ ընտանիքին և ընկերներին»,- հայտարարել է նա։

Եվրոպական խորհրդի նախագահ Շառլ Միշելն էլ հայտարարել է, որ Նավալնիի մահվան պատասխանատվությունն ընկնած է ՌԴ ղեկավարության վրա:

«Ալեքսեյ Նավալնին պայքարել է ազատության և ժողովրդավարության արժեքների համար։ Հանուն իր իդեալների՝ նա մեծ զոհաբերության գնաց։ ԵՄ-ն այս ողբերգական մահվան միանձնյա պատասխանատվությունը դնում է ռուսական ռեժիմի վրա։ Խորին ցավակցություն եմ հայտնում նրա ընտանիքին։ <...>Բայց ազատության համար պայքարը երբեք չի ավարտվում»,- X-ի իր միկրոբլոգում գրել է Միշելը։

Alexei @navalny fought for the values of freedom and democracy. For his ideals, he made the ultimate sacrifice.

The EU holds the Russian regime for sole responsible for this tragic death.

I extend my deepest condolences to his family. And to those who fight for democracy around…

— Charles Michel (@CharlesMichel) February 16, 2024

ՆԱՏՕ-ի գլխավոր քարտուղար Ենս Սթոլթենբերգը հայտարարել է, որ Նավալնիի մահվան հետ կապված բոլոր փաստերը պետք է պարզաբանվեն, իսկ «Ռուսաստանը պետք է լուրջ հարցերի պատասխանի»: Նրա մեկնաբանությունը հրապարակել է Sky News-ը։

Սթոլթենբերգը հավելել է, որ ինքը «խորապես վշտացած և անհանգստացած է» քաղաքական գործչի մահվան կապակցությամբ: «Ալեքսեյ Նավալնին երկար տարիներ եղել է ազատության և ժողովրդավարության ուժեղ ձայն։ ՆԱՏՕ-ի դաշնակիցները կոչ էին անում անհապաղ ազատ արձակել նրան»,- ասել է Սթոլթենբերգը։

Վրաստանի նախագահ Սալոմե Զուրաբիշվիլին էլ նշել է, որ ռուս ընդդիմադիր քաղաքական գործչի մահը ողբերգություն է ժողովրդավարության և մարդու իրավունքների բոլոր պաշտպանների համար։ «Ցավակցում եմ նրա ընտանիքին և նրանց, ովքեր Ռուսաստանում շարունակում են պայքարը հանուն ժողովրդավարության»,- գրել է Վրաստանի նախագահը։

Գերմանիայի կանցլեր Օլաֆ Շոլցն էլ հայտարարել է, որ Ալեքսեյ Նավալնու մահը ցույց է տալիս, թե ինչքան է փոխվել Ռուսաստանը։

«Դեռևս վերջնական հաստատում չկա, բայց մենք ելնում ենք նրանից, որ մեծ հավանականությամբ Նավալնին մահացել է ռուսական բանտում։ Դա մեզ շատ է ճնշում։ Ես Բեռլինում հանդիպել եմ նրա հետ, երբ բուժվում էր Գերմանիայում։ Խոսել եմ նրա հետ այն քաջության մասին, որը մղում էր նրան վերադառնալ Ռուսաստան։ Հիմա նա իր կյանքով է վճարել դրա համար։ Մենք շատ լավ գիտենք, թե դա ինչ ռեժիմ է։ Նա, ով քննադատում է, ով կողմ է ժողովրդավարությանը, պետք է վախենա իր կյանքի և իր անվտանգության համար: Ուստի մենք ցնցված ենք։ Մեր մտքերը նրա կնոջ, նրա երեխաների, նրա ընկերների, նրա հետևորդների հետ են։ Դա պարզապես սարսափելի է: Եվ սա նշան է, թե ինչպես է փոխվել Ռուսաստանը։ Ցավոք, այդ գործընթացը սկսվել է շատ վաղուց։ Այդ երկիրը վաղուց հեռացել է ժողովրդավարությունից, դա վաղուց ժողովրդավարություն չէ»,- ասել է Գերմանիայի կանցլերը։ 

This is terrible news. As the fiercest advocate for Russian democracy, Alexei Navalny demonstrated incredible courage throughout his life.

My thoughts are with his wife and the people of Russia, for whom this is a huge tragedy. https://t.co/AQvQQW5GBh

— Rishi Sunak (@RishiSunak) February 16, 2024

Թեմային անդրադարձել է նաև Մեծ Բրիտանիայի վարչապետ Ռիշի Սունաքը։

«Դա սարսափելի նորություն է։ Լինելով ռուսական ժողովրդավարության ամենավառ պաշտպանը՝ Ալեքսեյ Նավալնին իր ողջ կյանքի ընթացքում ցուցադրել է անհավանական խիզախություն։ Իմ մտքերը նրա կնոջ և Ռուսաստանի ժողովրդի հետ են, որոնց համար դա ահռելի ողբերգություն է»,- X-ի իր միկրոբլոգում գրել է Սունաքը։

Սքրինշոթը՝ AFP-ի