Իրանի նախագահ Էբրահիմ Ռայիսիի մահվանից հետո այդ երկրի նախագահի պարտականությունները կկատարի փոխնախագահ Մոհամադ Մոխբերը: Ինչպես գրում է Reuters-ը, դա սահմանված է այդ երկրի սահմանադրությամբ։ Նախագահի պաշտոնակատարի թեկնածությանը արդեն իսկ հավանություն է տվել Իրանի գերագույն առաջնորդ այաթոլա Ալի Խամենեին:

Խամենեին ուղղաթիռի կործանումից հետո, որտեղ գտնվում էր նախագահ Էբրահիմ Ռայիսին, հայտարարել էր, որ պետության կառավարման հետ կապված «խափանումներ չեն լինի»:

Իրանի օրենսդրությունը ենթադրում է, որ նախագահի մահից ոչ ուշ, քան 50 օր հետո երկրում պետք է հայտարարվեն նոր ընտրություններ: Reuters-ը գրում է, որ քվեարկությունը, ամենայն հավանականությամբ, տեղի կունենա հուլիսի սկզբին:

Մոհամադ Մոխբերը Իրանի փոխնախագահի պաշտոնը զբաղեցնում էր Ռայիսիի նախագահության մեկնարկից ի վեր։ Բացի այդ, արտաքին գործերի զոհված նախարարին էլ կփոխարինի փոխնախարար Ալի Բաղերի Քանին։

Հիշեցնենք, որ ​​ուղղաթիռը, որտեղ գտնվում էին Իրանի նախագահ Էբրահիմ Ռայիսին, ինչպես նաև ԱԳՆ ղեկավար Հոսեյն Ամիր Աբդոլահիյանը, կործանվել էր մայիսի 19-ի երեկոյան, երբ իրանական պատվիրակությունը բանակցություններից հետո վերադառնում էր Ադրբեջանից: Նախնական վարկածով՝ պատճառն անբարենպաստ եղանակային պայմաններն էին։ Կործանված ուղղաթիռը հայտնաբերվել է մայիսի 20-ի առավոտյան։ Ուղղաթիռում գտնվողներից և ոչ մեկը ողջ չի մնացել։

Լուսանկարը՝ IRNA գործակալության