Իրանական պետական IRNA գործակալությունը գրում է, որ Իրանի նախագահ Էբրահիմ Ռայիսիին, արտաքին գործերի նախարար Հոսեյն Ամիր Աբդոլահիյանին և մյուս պաշտոնյաներին տեղափոխող ուղղաթիռի վթարման պատճառը տեխնիկական անսարքությունն է։ 

«Ռայիսին զոհվել է կիրակի (2024 թվականի մայիսի 19-ին) ուղղաթիռի վթարի հետևանքով, որը տեղի է ունեցել տեխնիկական անսարքության պատճառով»,- ասված է հրապարակման մեջ։

Մեկ այլ պատճառ է առաջ քաշել Բելառուսում Իրանի դեսպան Ալիրեզա Սանեին։ Ըստ նրա՝ ուղղաթիռը կոշտ վայրէջք է կատարել եղանակային վատ պայմանների պատճառով։

Ուղղաթիռը կործանվել է լեռնային տեղանքում, որտեղ, դեսպանի խոսքով, «շատ խիտ մառախուղ է եղել, անգամ ձյուն է եղել, նվազագույն տեսանելիություն»: «Սա առաջին վարկածն է, թե ինչու է դա տեղի ունեցել։ Հենց այդ պատճառով էլ փրկարարներին ժամանակ է պահանջվել այնտեղ հասնելու համար», - հստակեցրել է Սանեին։

Դեսպանը հավելել է, որ փորձագետները կստուգեն՝ արդյոք ավիավթարի պատճառը կլիմայական պայմաններն էին, տեխնիկական խնդիրները, թե «ինչ-որ խոչընդոտներ», բայց դրա համար ժամանակ կպահանջվի: Դիվանագետը հրաժարվել է մեկնաբանել տեղեկությունն այն մասին, որ Իրանի իշխանությունները երկրի նախագահի մահվան մասին իմացել են ուղղաթիռի անհետացումից հետո առաջին ժամերի ընթացքում։ Նա կոչ է արել սպասել հետաքննության արդյունքներին:

Տելեգրամի իրանական հատվածի ալիքներում էլ պարբերաբար հրապարակվում են տեղեկություններ այն մասին, որ ուղղաթիռի կործանման հետ կարող է կապ ունենալ Իսրայելը, սակայն պաշտոնական մակարդում դրա վերաբերյալ պնդումներ չկան։ 

Հիշեցնենք, որ ​​ուղղաթիռը, որում գտնվում էին Իրանի նախագահ Էբրահիմ Ռայիսին, ինչպես նաև ԱԳՆ ղեկավար Հոսեյն Ամիր Աբդոլահիյանը, կործանվել էր մայիսի 19-ի երեկոյան, երբ իրանական պատվիրակությունը բանակցություններից հետո վերադառնում էր Ադրբեջանից: Նախնական վարկածով՝ պատճառն անբարենպաստ եղանակային պայմաններն էին։ Կործանված ուղղաթիռը հայտնաբերվել է մայիսի 20-ի առավոտյան։ Ուղղաթիռում գտնվողներից և ոչ մեկը ողջ չի մնացել։ Իրանում հնգօրյա սուգ է հայտարարվել։

Կոլաժը՝ ndtv.com-ից