Շանհայի համագործակցության կազմակերպության անդամ պետությունների թիվը հուլիսին Աստանայում կայանալիք գագաթնաժողովից հետո երկնիշ կդառնա Բելառուսի՝ կազմակերպության լիիրավ անդամ դառնալուց հետո։ Այդ մասին РИА Новости-ի փոխանցմամբ հայտարարել է կազմակերպության գլխավոր քարտուղար Չժան Մինը՝ ընդգծելով, որ այդ ընդլայնումը կդառնա «պատմական բեկում»։

Հունիսի 5-ին Տաշքենդում մեկնարկել է ՇՀԿ փորձագիտական ֆորումի 19-րդ նիստը։ Միջոցառմանը մասնակցում են կազմակերպությանն անդամակցող 10 երկրների ազգային-հետազոտական կենտրոնների ավելի քան 40 ներկայացուցիչներ:

«Հաջորդ ամիս Աստանայում կայանալիք ՇՀԿ գագաթնաժողովում Բելառուսի՝ ՇՀԿ-ին անդամակցելու մասին որոշում կկայացվի, այդպիսով կազմակերպության անդամ պետությունների թիվը կհասնի պատմական երկնիշի»,- ֆորումի բացմանը հայտարարել է Չժան Մինը։

Նրա խոսքով՝ «իր գործունեության ավելի քան 20 տարիների ընթացքում Շանհայի համագործակցության կազմակերպությունը պետությունների ղեկավարների հանդիպումների տարածաշրջանային մեխանիզմից վերածվել է խոշորագույն համապարփակ միջազգային կազմակերպության»։

Շանհայի համագործակցության կազմակերպությունը հիմնադրվել է 2001 թվականին: Դրան անդամակցում են Հնդկաստանը, Իրանը, Ղազախստանը, Չինաստանը, Ղրղզստանը, Ռուսաստանը, Տաջիկստանը, Պակիստանը և Ուզբեկստանը։ Դիտորդ երկրների թվում են են Աֆղանստանը, Բելառուսը և Մոնղոլիան, իսկ գործընկեր երկրներն են Ադրբեջանը, Հայաստանը, Կամբոջան, Նեպալը, ԱՄԷ-ն, Թուրքիան, Շրի Լանկան, Քուվեյթը, Մալդիվները, Մյանման և Բահրեյնը: 2023 թվականի հուլիսին Նյու Դելիում կայացած գագաթնաժողովի ժամանակ Իրանը դարձավ կազմակերպության լիիրավ անդամ։ Այնտեղ էլ Բելառուսը անդամ պետության կարգավիճակ ստանալու նպատակով պարտավորությունների մասին հուշագիր էր ստորագրել։

Լուսանկարը՝ User 699/Wikimedia Commons