«Եվրո-2024»-ի խմբային փուլի առաջին տուրում Շվեյցարիայի հավաքականը 3:1 հաշվով հաղթանակ տարավ Հունգարիայի ընտրանու նկատմամբ: Հանդիպումը կայացավ Քյոլնի մարզադաշտում:

Առաջին խաղակեսն անցավ շվեյցարացիների տարածքային առավելությամբ: Հանդիպման հաշիվը 12-րդ րոպեին բացեց Կվադվո Դուան: Առաջին կեսի վերջին րոպեին Միշել Էբիշերը կրկնապատկեց Շվեյցարիայի առավելությունը:

Երկրորդ կեսում հունգարացիներն ակտիվացան և սկսեցին մեծ ճնշում գործադրել մրցակցի դարպասին, ինչն էլ տվեց իր արդյունքը: 66-րդ րոպեին Բարնաբաս Վարգան կրճատեց հաշվի տարբերությունը, սակայն խաղը փրկել այդպես էլ չհաջողվեց, դեռ ավելին, Շվեյցարիան 93-րդ րոպեին կրկին վերականգնեց 2 գոլի առավելությունը, աչքի ընկավ Բրիլ Էմբոլոն՝ դնելով հանդիպման վերջակետը՝ 3:1:

Շվեյցարիայի և Հունգարիայի հետ A խմբում ընդգրկված Գերմանիայի և Շոտլանդիայի միջև նախօրեին կայացած խաղում հաղթել էին գերմանացիները՝ 5:1 հաշվով:

Այսօր կկայանան նաև B խմբի հանդիպումները՝ Իսպանիա-Խորվաթիա (20:00) և Իտալիա-Ալբանիա (23:00):

Լուսանկարը՝ ՈՒԵՖԱ-ի