Իրանում մեկնարկել են նախագահական ընտրությունները։ Իրանական լրատվամիջոցների փոխանցմամբ՝ Երևանի ժամանակով 06:30-ին բացվել են երկրի բոլոր ընտրատեղամասերը։ 

Իրանի ԿԸՀ ներկայացուցիչ Մոհսեն Էսլամիի խոսքով՝ տեղամասերը կփակվեն Երևանի ժամանակով ժամը 16:30-ին, սակայն անհրաժեշտության դեպքում դրանց աշխատանքը կերկարաձգվի: Իսլամական Հանրապետության ներքին գործերի նախարար Ահմադ Վահիդիի խոսքով՝ այս ընտրություններում մեծ նշանակություն է տրվում անվտանգության հարցին: Տեղամասերում անվտանգությունն ապահովում է շուրջ 180 հազար ոստիկան։ 

Իրանի նախագահի ընտրություններին մասնակցում են խորհրդարանի խոսնակ Մոհամմադ Բաղեր Ղալիբաֆը, Իսլամական Հանրապետության Անվտանգության խորհրդում հոգևոր առաջնորդի ներկայացուցիչ Սաիդ Ջալիլին, ներքին գործերի և արդարադատության նախարարությունների նախկին ղեկավար Մոստաֆա Փուրմոհամադին և առողջապահության նախկին նախարար Մասուդ Պեզեշքյանը:

Քվեարկության մեկնարկի օրվա նախօրեին ընտրություններին մասնակցելուց հրաժարվել է Թեհրանի քաղաքապետ Ալիրեզա Զաքանին, որը պահպանողականների ճամբարի երկու առավել հայտնի քաղաքական գործիչներին՝ Ջալիլիին և Ղալիբաֆին, խնդրել է միավորել ջանքերը ռեֆորմիստ Պեզեշքյանի դեմ:

Իրանում նախագահական 14-րդ ընտրություններն արտահերթ են Իրանի նախկին նախագահ Էբրահիմ Ռաիսիի ուղղաթիռի կործանման պատճառով և նախկին նախագահի մահվան պատճառով։

Լուսանկարը՝ Majid Asgaripour/Reuters