Իրանում մեկնարկել է նախագահական ընտրությունների 2-րդ փուլը։ Ընտրատեղամասերը բացվել են տեղի ժամանակով 08:00-ին` Երևանի ժամանակով 07:30-ին։ Իրանական IRNA գործակալության փոխանցմամբ՝ առաջինը քվեարկել է Իրանի հոգևոր առաջնորդ Ալի Խամենեին։

Հրապարակված կադրերից երևում է, որ դեռ ընտրատեղամասերի բացումից առաջ դրանց առջև հերթեր են գոյացել: Քվեարկության ընթացակարգի մեկնարկի մասին հայտարարել է Իրանի ներքին գործերի նախարար Ահմադ Վահիդին:

Ավանդույթի համաձայն՝ առաջինը քվեարկությանը մասնակցում է Խամենեին՝ դրանով իսկ օրինակ ծառայելով Իրանի քաղաքացիներին։ Քվեաթերթիկը քվեատուփի մեջ գցելու ժամանակ՝ Իրանի հոգևոր առաջնորդը դիմել է բնակչությանը՝ կոչ անելով նրանց երկրորդ փուլում ավելի ակտիվ քվեարկել:

Երկրորդ փուլում նախագահական աթոռի համար պայքարում են առողջապահության 69-ամյա նախկին նախարար, ռեֆորմիստ Մասուդ Պեզեշքիանը և Իրանի Ազգային անվտանգության բարձրագույն խորհրդում Իրանի հոգևոր առաջնորդի 58-ամյա ներկայացուցիչ, պահպանողական Սաիդ Ջալիլին: Առաջին փուլում, որը տեղի էր ունեցել հունիսի 28-ին, Պեզեշքիանն ու Ջալիլին հավաքել էին համապատասխանաբար 44 և 40 տոկոս ձայն: Ընտրություններին մասնակցությունը կազմել էր շուրջ 40 տոկոս, ինչը ամենացածր ցուցանիշն է Իսլամական Հանրապետության գոյության 45 տարվա ընթացքում:

Նախագահական մրցավազքի երկու մասնակիցներն էլ տնտեսական աճի, սոցիալական առաջընթացի և երկրի կայուն զարգացման կողմնակից են: Պեզեշքիանը հանդես է գալիս օտարերկրյա ներդրումների ներգրավման, Արևմուտքի հետ երկխոսության և Գործողությունների համատեղ համապարփակ ծրագրի վերականգնման օգտին:

Նախագահական մրցավազքի երկու մասնակիցներն էլ տնտեսական աճի, սոցիալական առաջընթացի և երկրի կայուն զարգացման կողմնակից են: Պեզեշքիանը հանդես է գալիս օտարերկրյա ներդրումների ներգրավման, Արևմուտքի հետ երկխոսության և Գործողությունների համատեղ համապարփակ ծրագրի վերականգնման օգտին: Առողջապահության նախկին նախարարը, որը ծագումով Իրանի Արևմտյան Ադրբեջան նահանգից է և ազգությամբ ադրբեջանցի, խոստացել է ընդլայնել Իսլամական Հանրապետության կանանց և էթնիկ փոքրամասնությունների իրավունքները, քննադատել իշխանությունների դիրքորոշումը պարտադիր հիջաբ կրելու մասով:

Ջալիլին էլ հանդես է գալիս արևմտյան պատժամիջոցների դեմ պայքարում ներքին ներուժի վրա հենվելու, զինված ուժերի ամրապնդման, ավիավթարում մայիսի 19-ին զոհված նախագահ Էբրահիմ Ռաիսիի արտաքին քաղաքական կուրսի շարունակման, ԲՐԻԿՍ-ին և Շանհայի համագործակցության կազմակերպությանը մասնակցության, Եվրասիական տնտեսական միության հետ Իրանի ազատ առևտրի գոտու ստեղծման, Ռուսաստանի և Չինաստանի հետ ռազմավարական գործընկերության խորացման օգտին: Նա կարծում է, որ ԱՄՆ-ը պետք է պատասխանատվություն կրի 2018 թվականին Գործողությունների համատեղ համապարփակ ծրագրից դուրս գալու համար։

Իրանցի վերլուծաբանները նշում են, որ նույնիսկ եթե նախագահական մրցավազքում հաղթի Պեզեշքիանը, Վաշինգտոնի հետ հարաբերությունները կարգավորելու նրա ծրագիրը կարող է մնալ թղթի վրա, եթե ԱՄՆ նախագահական ընտրություններում նոյեմբերին հաղթի Դոնալդ Թրամփը:

Կոլաժում՝ ձախից Սաիդ Ջալիլին, իսկ աջ լուսանկարում՝ Մասուդ Պեզեշքիանը, Getty Images