Այսօր Հայ բարեգործական ընդհանուր միությունում (ՀԲԸՄ) հանդիպում տեղի ունեցավ կանադահայ ռեժիսոր Ատոմ Էգոյանի հետ։ Նա խոսեց «Յոթ քող» ֆիլմի ստեղծման, հերոսուհու զգացմունքների և 12 տարի անց «Ոսկե ծիրան» կինոփառատոն իր վերադարձի մասին։

Հիշեցնենք, որ երեկ՝ հուլիսի 7-ին Երեւանում անցկացվող «Ոսկե ծիրան» կինոփառատոնը մեկնարկեց Էգոյանի «Յոթ քող» ֆիլմի ցուցադրությամբ, որը ոգեշնչված է Օսկար Ուայլդի «Սալոմե» պիեսից և Ռիխարդ Շտրաուսի համանուն օպերայից: 

Հանդիպման ընթացքում Էգոյանը նշեց, որ այս ֆիլմում իր զգացողությունները դրդել են նոր ուղղություն փնտրելու: Նա ցանկացել է, որ գլխավոր դերասանուհին կին ռեժիսոր լինի և նախագծին իր տեսանկյունից մոտենա: 

Էգոյանն ընդգծեց, որ իրեն համար ամենակարևորն այն դերասաններն են, որոնք բաց են և հետաքրքրասեր: «Ես ցանկանում եմ, որ իմ դերասանները իրենց կերպարներին հնարավորինս շատ մարդկություն ավելացնեն: Մենք կարող ենք խոսել այս գաղափարների մասին, և ես սիրում եմ խոսել այս գաղափարների մասին, բայց հենց նրանք են մարդու զգացմունքների պահապանները, ճիշտ չէ՞»,- նշեց նա:

Էգոյանը նաև պատասխանեց հանդիսատեսի հարցերին, ասաց, որ չնայած Հայաստանում խորքային փոփոխություններին, հայ ժողովրդի ոգին ուժեղ է:

«Փառատոնը ցույց է տալիս, որ մենք կարող ենք փոխանցել այս մշակույթը։ Սա գեղեցիկ է և թանկարժեք։ Մենք մենակ ենք որպես ժողովուրդ, միայն միմյանց ունենք։ Սա մեզ առանձնահատուկ է դարձնում։ Եվ չնայած դրան, մենք այսքան երկար ժամանակ բարգավաճել ենք»։

Ատոմ Էգոյանի «Յոթ քող» ֆիլմը հանդիսատեսը կկարողանա կրկին դիտել հուլիսի 14-ին, Կինոյի տան մեծ դահլիճում։