Ռուսաստանի արտաքին գործերի նախարար Սերգեյ Լավրովը հայտարարել է, որ եթե Հայաստանի իշխանությունները ցանկություն ունեն, առանց Ռուսաստանի մասնակցության, ուղիղ բանակցություններ վարել Ադրբեջանի հետ, ապա` «ի սեր Աստծո»։

«Նմանապես, մենք հիմա անհանգստանում ենք, որ 2020-2022 թվականներին Ռուսաստանի, Հայաստանի, Ադրբեջանի մի քանի գագաթնաժողովներում կնքված եռակողմ պայմանավորվածությունները նույնպես օդում են մնացել։ Ահա ես հիշատակեցի տրանսպորտային հաղորդակցության վերսկսումը և նշեցի եռակողմ հանձնաժողովի մասին, որը դրանով զբաղվում էր։ Վերջինս այժմ գրեթե չի հավաքվում։ Երևանը կարծում է, որ դա պետք է անել ուղղակիորեն Ադրբեջանի հետ, բայց եթե դա նրանց մոտ ստացվի, ապա «ի սեր Աստծո»»,- Մոսկվայի միջազգային հարաբերությունների պետական ինստիտուտի ուսանողների և դասախոսների առաջ իր ելույթի ժամանակ հայտարարել է Ռուսաստանի ԱԳ նախարարը։

Լավրովը նաև նշել է, որ հայ-ադրբեջանական պետական սահմանի սահմանազատման հարցում Ռուսաստանը պետք է խորհրդատվություն տար այդ գործընթացին մասնակից կողմերին, սակայն դա տեղի չի ունենում: «Ոչ, չեն ուզում, և միևնույն ժամանակ ձգտում են անընդհատ ներգրավել Արևմուտքին, Միացյալ Նահանգներին, Եվրամիությանը, Փարիզին, ցանկացած գործընթացի տրամադրմանը ներգրավել իրենց հովանավորներին։ Դա նրանց ընտրությունն է, բայց նախ պետք է պայմանավորվել ադրբեջանցի հարևանների հետ։ Այլ ճանապարհ չկա»,- հավելել է Լավրովը:

Փաստացի, Լավրովն այսպես է անվանել երկու օր առաջ ՀՀ վարչապետ Նիկոլ Փաշինյանի հայտարարությանն առ այն, որ Երևանը ներկայում ուղիղ երկխոսում է Բաքվի հետ և միջնորդների ներգրավման կարիք չի առաջանում։

Լուսանկարը՝ Turar Kazangapov/Reuters