Երեկ՝ սեպտեմբերի 11-ին, Նկարիչների միությունում բացվեց Երվանդ Քոչարի ավագ որդու՝ վաղամեռիկ նկարիչ, քանդակագործ Դավիթ Քոչարի ցուցահանդեսը՝ նվիրված նրա ծննդյան 85 և Երվանդ Քոչարի 125-ամյակին։ Ցուցադրվում են Դավիթ Քոչարի գեղանկարները, քանդակները, գրաֆիկական աշխատանքները:

Ցուցահանդեսը ներկայացրեց Երվանդ Քոչարի թոռնուհի, Դավիթ Քոչարի դուստր, դաշնակահարուհի Աննա Քոչարը։

_{Լուսանկարում Աննա Քոչարը, հոր՝ «Աննա դուստր» աշխատանքի կողքին (թուղթ, մատիտ, 1977թ.)}

«Քանդակագործ, նկարիչ Դավիթ Քոչարի գործերը երեսուն տարուց ավելի չեն ցուցադրվել, այսօր՝ նրա 85-ամյակին, «Վերածնունդ» խորագիրը կրող ցուցադրությունը նրա գործերի վերադարձի, բացահայտման խորհուրդն ունի»,- ցուցահանդեսի բացմանն ասաց Աննա Քոչարը։

Դավիթ Քոչարը ծնվել է մեծ վարպետ Երվանդ Քոչարի և դաշնակահարուհի Թամարա Իսահակյանի ընտանիքում։ Վաղ հասակից Դավիթ Քոչարը ստացել է երաժշտական կրթություն, եղել է ջութակահար Ավետ Գաբրիելյանի աշակերտը։ Շարունակել է կրթությունը կերպարվեստի ոլորտում։

24 տարեկանում՝ Մոնրեալի մրցույթում Դավիթ Քոչարի «Առյուծը առյուծի ձագերով» քանդակը հաղթող է ճանաչվել։

_{Լուսանկարում ձախից աջ՝ Դավիթ Քոչար, Ռուբեն Քոչար (հետևում), Երվանդ Քոչար, Հայկազ Քոչար, 1975թ., լուսանկարը Քոչարի թանգարանի կայքից:}

Դավիթ Քոչարի աշխատանքներն այսօր էլ կարելի է տեսնել Երևանում՝ Կենդանաբանական այգու զույգ առյուծները, պատկերասրահի պատի Աբովյանի հարթաքանդակը, Ծիծեռնակաբերդի մարմարե «Փյունիկ» հուշարձանը։ Դավիթը հոր՝ Երվանդ Քոչարի հետ աշխատել է Սասունցի Դավթի արձանի վրա։

_{Ռուբեն Քոչար}

«Հիմա քչերն են հիշում, որ Երվանդ Քոչարը ունեցել է երեք որդի, երեքն էլ տարբեր ուղղություններով տաղանդավոր։ Քանդակագործ, նկարիչ Դավիթը, որը մեծն էր մեր եղբարներից միշտ մեր կողքին է եղել, մենք տարբեր մայրերից ենք, բայց մենք հարազատ եղբայրներ ենք, իսկ Հայկազ Քոչարը տաղանդավոր ճարտարապետ էր։ Ռուբեն Քոչարի մասին շատ բան չեմ կարող ասել, որովհետև ես իմ մասին շատ քիչ գիտեմ»,- բացման խոսքի վերջում կատակելով ասաց կինոռեժիսոր, սցենարիստ Ռուբեն Քոչարը։

«Դավիթ Քոչար 85․ Վերածնունդ» խորագրով ցուցահանդեսը Նկարիչների միությունում բաց կլինի մինչև սեպտեմբերի 21-ը, մուտքն ազատ է։