Իսրայելի արտաքին գործերի նախարար Իսրայել Կացը «պերսոնա նոն գրատա» (անցանկալի անձ) է հայտարարել ՄԱԿ-ի գլխավոր քարտուղար Անտոնիո Գուտերեշին և արգելել նրա մուտքը Իսրայել: Այդ մասին նա գրառում է արել X-ի իր միկրոբլոգում։ 

«Յուրաքանչյուր ոք, ով չի կարող միանշանակ դատապարտել Իսրայելի վրա Իրանի նողկալի հարձակումը, ինչպես դա արել են աշխարհի գրեթե բոլոր երկրները, արժանի չէ ոտք դնել իսրայելական հողի վրա»,- հայտարարել է Կացը։

Today, I have declared UN Secretary-General @antonioguterres persona non grata in Israel and banned him from entering the country.

Anyone who cannot unequivocally condemn Iran's heinous attack on Israel, as almost every country in the world has done, does not deserve to step…

— ישראל כ”ץ Israel Katz (@Israel_katz) October 2, 2024

Նրա խոսքով՝ Գուտերեշը նաև չի դատապարտել ՀԱՄԱՍ-ի զինյալների հարձակումը Իսրայելի վրա, որը տեղի էր ունեցել 2023 թվականի հոկտեմբերի 7-ին, և ոչ մի ջանք չի գործադրել շարժումը ահաբեկչական կազմակերպություն հայտարարելու հարցում:

Իսրայելի ԱԳ նախարարը հավելել է, որ ՄԱԿ-ի ներկայիս գլխավոր քարտուղարը «բիծ կմնա կազմակերպության պատմության վրա», քանի որ «աջակցում է ահաբեկիչներին, բռնաբարողներին և մարդասպաններին»:

I condemn the broadening of the Middle East conflict with escalation after escalation.

This must stop.

We absolutely need a ceasefire.

— António Guterres (@antonioguterres) October 1, 2024

Հոկտեմբերի 1-ի երեկոյան այն բանից հետո, երբ Իրանը հրթիռային հարված հասցրեց Իսրայելին, Գուտերեշը X-ի իր միկրոբլոգում գրառում էր արել, որտեղ դատապարտել էր Մերձավոր Արևելքում հակամարտության սրումը և կոչ արել դադարեցնել կրակը: Իր գրառման մեջ նա չէր նշել ոչ Իրանին, ոչ էլ Իսրայելին։

Լուսանկարը՝ Amanuel Sileshi/AFP