HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

«Արհեստական բանականությունը անիմացիայի համար փորձադաշտ է». իսպանացի անիմատոր

Իսպանացի անիմատոր Խոակին Մարտինեսը կարծում է, որ արհեստական բանականությունը մոտ ապագայում անիմացիայի ոլորտում շրջադարձային փոփոխությունների է հանգեցնելու, ինչի մեկնարկը արդեն կարելի է տեսնել։ Մարտինեսը Հայաստան է ժամանել՝ մասնակցելու «ՌեԱնիմանիա» միջազգային անիմացիոն ֆիլմերի փառատոնին, որի ընթացքում այսօր կիսվել է անիմացիայի և ստեղծարար ոլորտների տեխնոլոգիական փոփոխությունների մասին պատկերացումներով ու փորձով։ Մարտինեսը նշում է, որ ԱԲ-ն այս պահին անիմացիայի համար փորձադաշտ է, խոշոր ընկերություններում այն դեռ լիարժեք չի ընդունվել, քանի որ խոշոր ներդրումներ է պահանջում։

«Շատերն իրենց աշխատանքում զգացել են դրա բացասական ազդեցությունը՝ կրճատումների տեսքով։ Անիմատորների մի հատված անորոշության մեջ է, մտածում են՝ ուր է գնում այս ամենը։ Բայց կարծում եմ, որ առաջիկա տարիներին մեծ դրական փոփոխություններ կլինեն»,- նշում է Խոակին Մարտինեսը։

Նրա խոսքով՝ անիմացիայում արհեստական բանականության ինտեգրումը արդեն թույլ է տալիս առանց հատուկ սարքավորումների իրականացնել այնպիսի առաջադրանքներ, որոնք նախկինում մեծ բյուջե էին պահանջում։ Սա նվազեցնում է աշխատանքային խմբերի չափերը՝ հնարավորություն տալով որակյալ անիմացիաներ ստեղծել մեկ-երկու մարդու ներգրավմամբ։

Մարտինեսն այստեղ էթիկական խնդիրներ է տեսնում. ԱԲ-ի ուսուցումը կատարվում է տվյալների հսկայական բազաների վրա, որոնք ներառում են հայտնի արվեստագետների և նկարիչների աշխատանքներ։

«Որպեսզի ԱԲ-ն սովորի, այն վարժեցվում է տվյալների մեծ բազայի վրա, դրա համար գիտի՝ ինչ է աթոռը կամ պատուհանը, բայց նաև գիտի, թե ով է Վան Գոգը ու ինչպես է ստեղծագործել։ Առանց թույլտվության այս տվյալներն օգտագործելը խնդրահարույց է»,- կարծում է անիմատորը։

Մարտինեսը ԱԲ-ն համարում է հզոր գործիք, սակայն շեշտում է, որ այն չպետք է փոխարինի մարդու ստեղծարարությանը։ Նրա խոսքով՝ AI-ը կարող է օգտագործվել որպես գաղափարների և նախագծերի զարգացման միջոց, սակայն վերջնական որոշումները պետք է ընդունվեն մարդկանց կողմից։

«Կարծում եմ՝ արհեստական բանականությունը հատկապես օգտակար է, երբ ճիշտ չի աշխատում։ Այսինքն՝ երբ այն «հալյուցինացիայի» մեջ է ընկնում կամ գնում է ուղղությամբ, որը չէիր նախատեսել։ Այդ ժամանակ է այն հետաքրքիր դառնում»,- ասում է Մարտինեսը։

Երևանում 16-րդ «ՌեԱնիմանիա» միջազգային անիմացիոն ֆիլմերի փառատոնը մեկնարկել է հոկտեմբերի 20-ին։ Փառատոնի հիմնադիրը քաղաքական երգիծանկարիչ, նկարիչ և անիմատոր Վրեժ Քասունին է։ Այս տարի ծրագիրը կազմված է 3 բաղադրիչից՝ ցուցադրվող ֆիլմերը, MarAni անիմացիոն շուկան և Rea Comics Art-ը։

Փառատոնն այս տարի առանձնանում է ոչ միայն ֆիլմերի մեծ ընտրանիով, այլև կրթական հատվածով, վարպետաց դասերով, որոնք միավորել են տեղական և միջազգային ոլորտի առաջատարներին։ «ՌեԱնիմանիա»-ի շրջանակում անիմացիոն ֆիլմեր Երևանում կցուցադրվեն մինչև հոկտեմբերի 27-ը։

Լուսանկարում՝ Խոակին Մարտինեսը

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter