Վրաստանի նախագահ Սալոմե Զուրաբիշվիլին նախագահական պալատում կայացած հատուկ մամուլի ասուլիսի ժամանակ հայտարարել է, որ չի ճանաչում խորհրդարանական ընտրությունների պաշտոնական արդյունքները:

Զուրաբիշվիլին նշել է, որ այդ ընտրությունների ճանաչումը նշանակում է «Ռուսաստանի գալուստն ու Վրաստանի ենթակայությունը»: «Ես դրա համար չեմ եկել այս երկիր։ Մեր նախնիները դրա համար չեն ապրել, և մենք դա չենք ընդունի։ Ոչ ոք չի կարող Վրաստանից խլել եվրոպական ապագան»,- հայտարարել է նա։ 

BREAKING: President @Zourabichvili_S announces that she does not recognize the elections results and call the people to join her. Zurabishvili asks people to join the protest at Rustaveli tomorrow at 7PM.

President tells the Georgian people that they won these elections, and… pic.twitter.com/gXfP58dghN

— Katie Shoshiashvili (@KShoshiashvili) October 27, 2024

Զուրաբիշվիլին ընդդիմության աջակիցներին կոչ է արել երկուշաբթի՝ հոկտեմբերի 28-ի երեկոյան, դուրս գալ բողոքի ակցիաների:

Նախագահն իր հայտարարությունն արել է ընդդիմադիր հիմնական կուսակցությունների հետ խորհրդակցելուց հետո:

Վրաստանի կենտրոնական ընտրական հանձնաժողովի տվյալներով՝ իշխող «Վրացական երազանք» կուսակցությունը, որին ընդդիմությունն ու փորձագետներն անվանում են «ռուսամետ», ստացել է ձայների 53,9%-ը։ 

Խորհրդարան են անցել նաև ընդդիմադիր չորս կուսակցություններ, որոնք հանդես են գալիս Արևմուտքի հետ առավել մերձեցման օգտին: Նրանք բոլորը հայտարարել են, որ չեն ճանաչում քվեարկության արդյունքները և դրանք համարում են կեղծված։ «Կոալիցիա՝ հանուն փոփոխությունների» և «Միացյալ ազգային շարժում» կուսակցությունները պաշտոնապես հայտարարել են, որ հրաժարվում են մանդատներից։ 

ԵԱՀԿ դիտորդական առաքելությունը մատնանշել է մի շարք լուրջ խախտումներ, սակայն իր զեկույցում կասկածի տակ չի դրել ընտրությունների արդյունքները: ԵՄ-ում կոչ են արել Վրաստանի ԿԸՀ-ին օպերատիվ կերպով հետաքննել խախտումներն ու կարծիք հայտնել, որ Վրաստանի համար այժմ հատկապես կարևոր է «քաղաքական բոլոր ուժերի միջև կառուցողական ու ներառական երկխոսությունը»:

Լուսանկարը՝ Reuters գործակալության