Իսրայելի իշխանություններն ու լիբանանյան Հեզբոլահ խմբավորումը պայմանավորվել են իսրայելա-լիբանանյան սահմանին ռազմական գործողությունների դադարեցման մասին։ Այդ մասին հայտնել է ԱՄՆ նախագահ Ջո Բայդենը։

Նրա խոսքով՝ զինադադարի առաջարկով հանդես է եկել Միացյալ Նահանգները, իսկ Լիբանանի և Իսրայելի վարչապետներն ընդունել են այն: Իսրայելի վարչապետ Բենիամին Նեթանյահուի գրասենյակից հաստատել են, որ երկրի ռազմաքաղաքական կաբինետը հավանություն է տվել Լիբանանում հրադադարի մասին առաջարկին:

Պայմանավորվածության համաձայն՝ հրադադարի ռեժիմն ուժի մեջ է մտել նոյեմբերի 27-ին՝ տեղի ժամանակով ժամը 04:00-ին (Երևանի ժամանակով` 06:00-ին): Բացի այդ, Իսրայելը 60 օրվա ընթացքում ստիպված կլինի աստիճանաբար դուրս բերել իր զորքերը լիբանանյան տարածքներից:

Ջո Բայդենն ընդգծել է, որ ԱՄՆ-ն իր զորքերը չի տեղակայի Լիբանանի հարավում: Փոխարենը, ըստ նրա, Միացյալ Նահանգները Ֆրանսիայի և այլ երկրների հետ միասին «անհրաժեշտ օգնություն կտրամադրի» հակամարտության կողմերին:

Իր ելույթում ԱՄՆ նախագահը նշել է, որ Գազայի հատվածի բնակիչները, ինչպես և Լիբանանի բնակչությունը, «արժանի են անվտանգ և բարգավաճ ապագայի», ինչպես նաև ռազմական գործողությունների դադարեցմանը:

«Առաջիկա օրերին ԱՄՆ-ն Թուրքիայի, Եգիպտոսի, Կատարի, Իսրայելի և մյուս երկրների հետ միասին հերթական փորձն է ձեռնարկելու Գազայում հրադադարի հասնելու ուղղությամբ»,- հայտարարել է ԱՄՆ առաջնորդը։

Նա նաև ՀԱՄԱՍ-ին կոչ է արել ազատ արձակել պատանդներին, որոնց շարժման անդամները գերեվարել էին 2023 թվականի հոկտեմբերին՝ Իսրայելի վրա հարձակման ժամանակ։ 

2023 թվականի հոկտեմբերի 7-ին Իսրայելի վրա ՀԱՄԱՍ-ի անդամների հարձակումից և Գազայի հատվածում իսրայելական պատասխան գործողության մեկնարկից հետո, Հեզբոլահը պարբերաբար հրթիռակոծում էր Իսրայելի տարածքը։ Ի պատասխան՝ իսրայելական ուժերը սկսեցին հարվածներ հասցրել լիբանանյան այս խմբավորման հետ կապված օբյեկտներին։ 

Հոկտեմբերի սկզբին Իսրայելը հայտարարել էր Լիբանանում «սահմանափակ ռազմագործողության» մեկնարկի մասին: Իսրայելի պաշտպանության բանակը ռազմական գործողության նպատակ էր հայտարարել Հեզբոլահի ենթակառուցվածքների ոչնչացումը։ Լիբանանի մայրաքաղաք Բեյրութն ամենօրյա ռեժիմով հրթիռակոծվում էր իսրայելական ուժերի կողմից։

Լուսանկարը՝ Jalaa Marey/AFP via Getty Images