Պարզվում է` քաղաքաշինության նորանշանակ նախարար Սամվել Թադեւոսյանը սեր ունի ոսկյա զարդերի եւ գեղանկարների նկատմամբ: Նա 12 միլիոն դրամի գեղանկարների հավաքածու ունի, ինչպես նաեւ 30 միլիոն դրամի ադամանդե քարեր եւ ոսկյա զարդեր:

Նախարարը անշարժ գույքի պակաս էլ չունի: Երեւան քաղաքում ունի 480.7 քմ մակերեսով բնակելի տուն, մայրաքաղաքի մեկ այլ հասցեում հողամաս, լողավազան, անավարտ կառույց, 74.8 քմ մակերեսով բնակարան: Կոտայքի մարզի Ջրվեժ գյուղում ունի 0.889 հա վարելահող եւ 600 հատ պտղատու ծառեր, իսկ Ծաղկաձոր քաղաքում համատեղ սեփականության իրավունքով նախարարին է պատկանում 294.32 քմ բնակելի տուն եւ 0.058 հա հողամաս:

Սամվել Թադեւոսյանն ունի մեկ ավտոմեքենա` 2008 թ. արտադրության «ԲՄՎ X5»:

2012թ. մարտի 1-ի դրությամբ, վերջին մեկ տարվա կտրվածքով, նախարարն ունեցել է 27 միլիոն 233 հազար դրամ եկամուտ, որից 5 միլիոն 233 հազար դրամը վերահսկիչ պալատից ստացած աշխատավարձն է (մինչեւ պատգամավոր, ապա նաեւ նախարար դառնալը, Սամվել Թադեւոսյանը աշխատել է վերահսկիչ պալատում), իսկ 22 միլիոնը` գյուղմթերքների իրացումից ստացված եկամուտն է:

Մարտի 1-ի դրությամբ նախարարի հաշվին եղել է 20 միլիոն դրամ, 20 հազար դոլար եւ 6 հազար եվրո:

Ուշագրավ մի փաստ. բոլոր պաշտոնյաները գյուղմթերքների իրացումից միլիոնատեր են դառնում, բացի հողագործությամբ զբաղվող գյուղացուց: Բազմիցս հորդորել ենք պաշտոնյաներին բացել «հաջողությունների գաղտնիքը», սակայն` ապարդյուն:

Լուսանկարը՝ henaran.am-ի