Սիրիայում ստեղծված անվտանգային իրավիճակով պայմանավորված՝ Դամասկոսում ՀՀ դեսպանության դիվանագիտական անձնակազմն իր աշխատանքները ժամանակավորապես կշարունակի Բեյրութից։ Այս մասին հայտնում է ՀՀ Արտաքին գործերի նախարարությունը։

«Անցած շաբաթ Դամասկոսում դեսպանությունում թեժ գծի հայտարարումից հետո դեսպանությունը պատասխանել է ստացված զանգերին, որոնք վերաբերել են ՀՀ մուտքի արտոնագրերի, անձնագրերի ստացմանը, տարհանման հնարավորությանը։ Վերջինիս անվտանգ հնարավորությունն այս պահին բացակայում է։ Հաջորդիվ, ՀՀ քաղաքացիների հետ կապը կպահպանվի Բեյրութում ՀՀ դեսպանությունից` հետևյալ թեժ գծի միջոցով +96176447205 (բջջային)»,- նշված է ԱԳՆ հաղորդագրության մեջ:

Տեղեկացնենք, որ Սիրիայի նախագահ Բաշար ալ-Ասադը կիրակի առավոտյան լքել է երկիրը՝ հեռանալով անհայտ ուղղությամբ: Այդ մասին հաղորդել է Associated Press լրատվական գործակալությունը՝ վկայակոչելով Մարդու իրավունքների սիրիական դիտարանի ղեկավարին:

Նախօրեին հաղորդվել էր իսլամիստ գրոհայինների գլխավորած ապստամբների՝ Սիրիայի ևս մեկ կարևորագույն շրջանի՝ Դարաայի նկատմամբ վերահսկողություն հաստատելու, ապա կենտրոնական Հոմս քաղաք մտնելու և Դամասկոսի մատույցներին մոտենալու մասին:

Իսլամիստ զինյալներն իրենց հարձակումը սկսել էին նոյեմբերի 27-ին և գրավել էին Հալեպ ու Համա քաղաքները: