Վրաստանի մայրաքաղաք Թբիլիսիում դիմակավորված անձինք ուղիղ եթերի ժամանակ հարձակվել են ընդդիմադիր TV Pirveli հեռուստաալիքի նկարահանող խմբի վրա: Միջադեպը տեղի է ունեցել շարունակվող զանգվածային ցույցերի ֆոնին Վրաստանի խորհրդարանի շենքի մոտ՝ շաբաթ օրը՝ դեկտեմբերի 7-ի երեկոյան:

Հարձակման հետևանքով տուժել են լրագրող Մակա Չիխլաձեն և օպերատոր Գեորգի Շեցիրուլին։ Грузия Online-ը փոխանցում է, որ նրանք հոսպիտալացվել են ուղեղի ցնցումով։ Բժիշկների խոսքով՝ լրագրողների կյանքին վտանգ չի սպառնում։

Footage of the attack on a TV Pirveli journalists#RepressioninGeorgia

🎥 TV Pirveli pic.twitter.com/MDaBu0lPeg

— Mtavari TV (@MtavariChannel) December 7, 2024

Դեպքից ժամեր անց Վրաստանի հատուկ քննչական ծառայությունը հետաքննություն է սկսել լրագրողների վրա հարձակման փաստով: Գերատեսչությունում ընդգծել են, որ իրականացնում են «բոլոր անհրաժեշտ գործողությունները» մեղավորներին հայտնաբերելու և ձերբակալելու համար: TV Pirveli-ի տնօրեն Վաթո Ծերեթելին 25 000 ԱՄՆ դոլար է խոստացել նրան, ով տեղեկություններ կփոխանցի հարձակում գործած անձանց վերաբերյալ։

Վրաստանի մարդու իրավունքների պաշտպան Լևան Իոսելիանին դատապարտել է նկարահանող խմբի վրա հարձակումը։ Ոստիկանությանը նա կոչ է արել «անհապաղ արձագանքել և ապահովել քաղաքացիների անվտանգությունը»:

Երկրի նախագահ Սալոմե Զուրաբիշվիլին էլ, որն աջակցում է ցուցարարներին, Վրաստանի ՆԳՆ-ին կոչ է արել «անհապաղ միջոցներ ձեռնարկել՝ ի պատասխան սարսափելի իրադարձությունների»:

Unbearable to watch, indisputable proof - and yet, still no reaction from the police or responsible authorities.

I call on the MIA to take immediate action in response to the atrocities unfolding on the streets and arrest those responsible without delay. pic.twitter.com/6MOqb7DuFQ

— Salome Zourabichvili (@Zourabichvili_S) December 7, 2024

Հարևան Վրաստանում արդեն մի քանի օր է՝ ծայրահեղ լարված է։ Տասնյակ հազարավոր ցուցարարներ դուրս են գալիս մայրաքաղաք Թբիլիսիի և Վրաստանի մյուս քաղաքների փողոցներ՝ իրենց բողոքն արտահայտելու իշխանության ղեկին գտնվող «Վրացական երազանք» կուսակցության վարած քաղաքականության դեմ։ Այս բողոքի ակցիաների հիմնական պատճառը վարչապետ Իրակլի Կոբախիձեի՝ մի քանի օր առաջ արած հայտարարությունն է այն մասին, որ Վրաստանը մինչև 2028 թվականը դադարեցնում է Եվրամիության հետ անդամակցության շուրջ բանակցությունները, ինչպես նաև համատեղ բոլոր ծրագրերը, այդ թվում` ԵՄ դրամաշնորհները։ 

Լուսանկարը՝ OC Media-ից