Ռուսական կողմը հուսով է, որ ՀՀ վարչապետ Նիկոլ Փաշինյանը դեկտեմբերի վերջին Սանկտ Պետերբուրգում կմասնակցի ԱՊՀ երկրների ղեկավարների ոչ պաշտոնական հանդիպմանը։ Այդ մասին РИА Новости-ին հայտնել է ՌԴ արտաքին գործերի նախարարի տեղակալ Միխայիլ Գալուզինը:

«Բոլորը հրավիրված են, և այսօր, այնուամենայնիվ, դեկտեմբերի 16-ն է, իսկ այն միջոցառումները, որոնց մասին դուք հարցրիք, մի փոքր ավելի ուշ կլինեն: Հուսով ենք, որ բոլոր նրանք, ում հրավիրել ենք, կգան Սանկտ Պետերբուրգ։ ... Այդ թվում՝ Նիկոլ Վովայի Փաշինյանը։ Մենք հույս ունենք, իսկ թե ինչ կստացվի այնտեղ՝ կտեսնենք»,- հայտարարել է ռուսաստանցի պաշտոնյան։

Ավելի վաղ նման հույս էր հայտնել նաև ՌԴ նախագահի մամուլի քարտուղար Դմիտրի Պեսկովը։

«Սանկտ Պետերբուրգում պարոն Փաշինյանին սպասում են։ Նախագահը նրան հրավիրել է և, իհարկե, ակնկալում է նրա ներկայությունը՝ մյուս գործընկերների հետ միասին»,- նշել էր Պեսկովը։

Նա հավելել էր, որ չնայած գագաթնաժողովը ոչ պաշտոնական բնույթ է կրում, այն կունենա բավականին բովանդակալից օրակարգ։

Նիկոլ Փաշինյանն ԱՊՀ ղեկավարների ոչ պաշտոնական հանդիպումներին մասնակցում է 2018 թվականից։ Վերջին տարիներին ձևավորվել է ավանդույթ՝ այս գագաթնաժողովները դեկտեմբերի վերջին անցկացնել Ռուսաստանում՝ Սանկտ Պետերբուրգում։ Այս հանդիպումների ժամանակ, որպես կանոն, հաստատված օրակարգ չի լինում, և ԱՊՀ երկրների առաջնորդները ոչ պաշտոնական միջավայրում քննարկում են իրենց հետաքրքրող հարցերը։

Լուսանկարը՝ ՀՀ վարչապետի մամուլի ծառայության