Այսօր Քննչական կոմիտեի դիմաց կրկին բողոքի ակցիա են իրականացնում 2025թ. մարտի 15-ին Ոստիկանության Վանաձորի բաժնում ենթադրաբար բռնության ենթարկված Տիգրան Ուլուբաբյանն ու մի խումբ քաղաքացիներ, իրավապաշտպաններ և ընդդիմադիր խմբակցությունների պատգամավորներ: Մասնակիցները Քննչական կոմիտեի շենքի մոտից քայլերթով շարժվում են դեպի Ներքին գործերի նախարարություն՝ «արդարություն», «ոչ ամենաթողությանը», «ոչ խտրականությանը» վանկարկումներով:

Տիգրանի ներկայացուցիչ, փաստաբան Ռոման Երիցյանն ասաց, որ ակցիաների նպատակն է ցույց տալ, որ Ուլուբաբյանը միայնակ չէ: Բացի այդ, եթե նախկինում կարծում էր, որ իրավապահ մարմիններում բռնությունը կամ խտրական վերաբերմունքը կապ չուներ այդ անձանց արցախցի լինելու հետ, ապա հիմա համոզվում է, որ հենց այդ հանգամանքով է պայմանավորված: Իր նկատմամբ նույնպես իրավապահ մարմինները ճնշումներ են սկսել գործադրել: 

Հիշեցնենք, որ Տիգրանի բարեկամներից մեկը ավազակային հարձակման է ենթարկվել։ Դրանից հետո 29-ամյա Տիգրանին երկու օր՝ մարտի 14-ին և 15-ին, հրավիրել են Ոստիկանության Վանաձորի բաժին, Քննչական կոմիտե՝ ասելով, թե կապ ունի ավազակային հարձակման հետ: Սակայն վերջին այցի ժամանակ, Տիգրանի պնդմամբ, Ոստիկանության բաժնում ծեծել են իրեն, փորձել նվաստացնել ու հայհոյել:

Տիգրանը Արցախից բռնի տեղահանվել է 2023թ․-ին։ Նրա եղբայրը զոհվել է 2017թ․-ին՝ Արցախում ադրբեջանցիների դիվերսիոն հարձակման ժամանակ։ Հայրը նույնպես զոհվել է, մայրը՝ մահացել: Նրանք հուղարկավորված են Արցախում։ Տիգրանը Վանաձորում ապրում է միայնակ, վարձակալած տանը։

Փաստաբան Ռոման Երիցյանը հայտարարեց, որ Ներքին գործերի նախարարությունը Քննչական կոմիտեի հետ համատեղ մեծ արշավ է սկսել իր դեմ՝ ոստիկանական խոշտանգումների մասին բարձրաձայնելուց և այդ մասով Քննչական կոմիտեի վարած նախաքննությունը քննադատելուց հետո։ Նրա դիտարկմամբ՝ իր դեմ փորձում են հաղորդումներ կորզել վստահորդներից, որ մեղադրանք առաջադրեն: Շատերը հրաժարվել են հաղորդում տալ, սակայն մեկ կին հաղորդում է ներկայացրել: Նա հայտնել է, թե փաստաբան Երիցյանն իրենից խարդախությամբ մեծ գումար է վերցրել։ Այդ հաղորդումն արդեն Ոստիկանությունից ուղարկվել է Քննչական կոմիտե, նախաձեռնվել է քրեական վարույթ:

Ռոման Երիցյանի պնդմամբ՝ այդ կնոջ հետ հանդիպել է, հասկացել է, որ մոլորության ազդեցության տակ է հաղորդում ներկայացրել: Կինը պատրաստ է ներկայանալ քննչական մարմիններին և պարզաբանումներ ներկայացնել, որ որևէ խնդիր չի ունեցել փաստաբանի հետ, վերջինիս հետ ունի լավ հարաբերություններ:

Ինչ վերաբերում է բռնության ենթարկված Տիգրան Ուլուբաբյանին, ապա Ռոման Երիցյանն ասում է, որ պատշաճ քննություն չի իրականացվում: Տիգրանը մատնացույց է անում կոնկրետ անձանց՝ խնդրելով վերջիններին հարցաքննել, քանի որ կապ ունեն իրեն ծեծելու և նվաստացնելու հետ, սակայն Քննչական կոմիտեն քայլեր չի ձեռնարկվում: Ավելին՝ նույնիսկ նրանց լիազորությունները չի կասեցվում և շարունակում են աշխատել:

Բողոքի ակցիայի ժամանակ Ռ. Երիցյանը պատմեց, որ Տիգրանի հետ Վանաձորի ոստիկանների առերես հարցաքննությունների ժամանակ իրեն թույլ չեն տվել հեռախոսով ներկայանալ հարցաքննությանը, սակայն ոստիկանների փաստաբաններին թույլ են տվել: Ռոմանը նաև նկատել է, որ հարցաքննության իրենց հերթին սպասող ոստիկանները Քննչական կոմիտեի պաշտոնյաների սենյակում ծխել են, սուրճ խմել, ինչը նշանակում է, որ Քննչական կոմիտեն ակնհայտ կողմնակալ վերաբերմունք ունի և ամենևին նպատակ չի հետապնդում օբյեկտիվ քննութուն իրականացնել, բացահայտել քաղաքացուն ծեծելու դեպքը:

Բողոքի ակցիային մասնակցող Ազգային ժողովի «Պատիվ ունեմ» խմբակցության պատգամավոր Տիգրան Աբրահամյանը նշեց, որ իշխանությունների վերաբերմունքը միայն բռնություններով չի սահմանափակվում, և Տիգրանի դեպքը եզակի չէ: Արցախցիների գրեթե բոլոր իրավունքներն են խախտվում, հատկապես այն անձանց, որոնք համաձայն չեն իշխանությունների վարած քաղաքականության հետ, բարձրաձայնում են Արցախը հանձնելու մասին: Սակայն, ըստ պատգամավորի՝ այնպես չէ, որ Հայաստանում միայն արցախցիների իրավունքներն են խախտվում: Քաղաքական հետապնդման են ենթարկվում նաև իշխանությունների ընդդիմախոսները:

Լուսանկարները՝ Նարեկ Ալեքսանյանի