Արցախցիների իրավունքների պաշտպանության հավաքի ընթացքում, որն անցկացվում էր Երևանի Ազատության հրապարակում, Արցախի նախկին մշակույթի նախարար Լեռնիկ Հովհաննիսյանը ելույթ ունեցավ՝ անդրադառնալով Արցախի մշակութային ժառանգության հարցերին։

«Արցախը հայկական մշակույթի գանձարանն է: Այսօր Ադրբեջանը Արցախում մշակութային ցեղասպանություն է իրականացնում: Հայաստանը, հետ կանչելով Ադրբեջանի դեմ հայցերը Մարդու իրավունքների եվրոպական դատարանից, կանաչ լույս կվառի Ադրբեջանի առջև»,- նշել է Հովհաննիսյանը:

Հավաքի ավարտին կազմակերպիչներն արցախցիների անունից մի քանի կետից բաղկացած պահանջագիր կներկայացնեն Հայաստանի կառավարությանը: Հետագա քայլերը կորոշվեն՝ կախված Կառավարության պատասխանից:

Մինչ Կառավարությունը արձագանքի Արցախի իրավունքների պաշտպանության պահանջագրին, Ազատության հրապարակում կտեղադրվեն վրաններ նստացույցի մասնակիցների և շարժման շտաբի համար: