2024 թվականի ապրիլի վերջի դրությամբ Հայաստանի պետական պարտքը կազմել է 13 մլրդ 608 մլն դոլար։ Ինչպես ցույց են տալիս Ֆինանսների նախարարության տվյալները, տարեսկզբի համեմատ պետական պարտքն աճել է 766 մլն դոլարով կամ 6%-ով։ 

Այս տարվա մարտին Հայաստանը միջազգային կապիտալի շուկայում տեղաբաշխեց 750 մլն ԱՄՆ դոլար ծավալով, 10 տարի մարման ժամկետով եվրապարտատոմսեր (եվրոբոնդեր)` 7.1% եկամտաբերությամբ։ Այդպիսով, պետությունը 750 մլն դոլար նոր և ավելի թանկ պարտք վերցրեց։ 

Ինչո՞ւ է պետությունը միանգամից 750 մլն դոլարի կարիք ունեցել:

Եթե շատ կարճ՝ նախկինում վերցված պարտքերը մարելու ժամանակն է եկել, իսկ բյուջեն չի բավականացնում դրանք մարելու համար։ Հետևաբար, պետությունը նոր պարտք է վերցնել։

Այս գործարքը ևս նպաստել է պարտքի ավելացմանը։

Առհասարակ պետական պարտքը մի կողմից ավելանում է՝ եվրոբոնդերի, արտաքին վարկերի, ներքին ու այլ արտաքին աղբյուրներից ներգրավվող գումարների հաշվին, մյուս կողմից՝ մարվում են հին պարտքերը, տոկոսավճարներ վճարվում։

• Պետությունը 750 մլն դոլար նոր և ավելի թանկ պարտք է վերցրել. եվրոբոնդերի թողարկումը

Եվրապարտատոմսերի թողարկմամբ բացատրվեց նաև Հայաստանի միջազգային պահուստների կտրուկ աճը մարտին։ 

Այս տարվա ապրիլի վերջի դրությամբ Հայաստանի արտաքին պարտքը կազմել է մոտ 7.1 մլրդ ԱՄՆ դոլար՝ տարվա սկզբի համեմատ աճելով  9.4%-ով։ 

Ներքին պարտքը՝ 6.5 մլրդ ԱՄՆ դոլար՝ աճելով 2.5%-ով։

Հայաստանի ամբողջ պետական պարտքի միայն մոտ 4%-ն է Կենտրոնական բանկի պարտքը, մնացածը ՀՀ կառավարությանն է։ 

Հիշեցնենք, որ 2024 թվականի տվյալներով՝ պարտքի բեռը պահպանվել է ՀՀ հարկաբյուջետային կանոններով թիրախավորվող 50%-ից ցածր մակարդակում. կառավարության պարտք/ՀՆԱ ցուցանիշը կազմել է 48.3%: 

Տարեվերջի դրությամբ Հայաստանի ամենախոշոր վարկատուն Համաշխարհային բանկն է։ 

Տես նաև՝

• Նախարարը թերի տեղեկություն է տալիս. Հայաստանի պետական պարտքը 12.8 մլրդ դոլար է
• Հայաստանի պետական պարտքը. որքան է ծախսում պետությունը, և ովքեր են գլխավոր պարտատերերը