«Արմավիր» քրեակատարողական հիմնարկում երեկ՝ օգոստոսի 28-ին, մահացել է կալանավորված 63-ամյա Արտաշես Վարդանյանը։ Այս մասին ահազանգել է վերջինիս պաշտպան Էրիկ Բեգլարյանը՝ նշելով, որ իր պաշտպանյալն ունեցել է գանգատներ, սակայն համապատասխան ուշադրության չի արժանացել Քրեակատարողական ծառայության աշխատակիցների կողմից, ինչի հետևանքով էլ մահացել է։

Նա «Հետքին» հայտնեց, որ մոտ 9 ամիս էր, ինչ իր պաշտպանյալը անազատության մեջ էր, 4 ամիս առաջ 2 անգամ իրեն հայտնել է, որ առողջական վիճակն այնքան էլ լավ չէ։ Փաստաբանի պատմելով՝ ինքը խորհուրդ է տվել Արտաշես Վարդանյանին, որ գանգատներ ունենալու դեպքում դիմի Քրեակատարողական ծառայության աշխատակիցներին։ «Ես ասացի, ճիշտն ասած, քանի որ դու հիմնարկի ներքո ես գտնվում, այսինքն՝ հիմնարկն է քո առողջության պատասխանատուն, պետք է իրենք զբաղվեն։ Դու երբ որ քեզ լավ չես զգում կամ որևէ մի հատ խորը հետազոտություն ես ուզում, գնա, քրեակատարողական հիմնարկին դիմի»,- պատմում է փաստաբանը։ Նա նշում է, որ Արտաշես Վարդանյանի եղբայրը հայտնել է իրեն, որ եղբորը ևս պարբերաբար բողոքել է առողջական վիճակից։ 

Էրիկ Բեգլարյանն ասում է՝ իր տեղեկություններով՝ չեն հետազոտել իր պաշտպանյալին, նույնիսկ մինչև հիմա ո՛չ ինքը, ո՛չ հարազատները չգիտեն, թե առողջական ինչ խնդիր է ունեցել։ «Ինքը ասում էր՝ մեջիցս վառվում է, փորի մեջից վառում է։ Փաստորեն, հետազոտության ենթակա մարդ է եղել։ Դուք դեղ եք տալիս մարդուն, բայց չեք հարցնում, չեք հետազոտում, տեսնեք՝ ինչից է»,- ասում է փաստաբանը։

Էրիկ Բեգլարյանը պնդում է՝ չեն տարել հետազոտության իր պաշտպանյալին։ «Կարճ ասած, բարձիթողի վիճակ է էլի եղել։ Ես էսօր դաժե լսել եմ, որ արդեն 17-րդ ազատությունից զրկված մարդն է, որ մահանում է ՔԿՀ-ում»,- նշում է փաստաբանը։ 

Էրիկ Բեգլարյանը պատմեց նաև դեպքի մանրամասները։ Ըստ նրա՝ երեկ՝ օգոստոսի 28-ին՝ ժամը 19։00-ի սահմաններում, իր պաշտպանյալը հայտնել է, որ իրեն վատ է զգում։ «Միզել է, արյուն է եկել։ Քանի որ իր տղան էլ է գտնվում այդ նույն քրեակատարողական հիմնարկում, կալանավորված է, տղային բերել են, ասել են՝ պապայիդ մեզն է, մաքրի, սաղ արյուն է արել կամեռը։ Տղան սաղ մաքրել է, բայց հայրն այդ պահին էլի վատ է զգացել։ Տեսել են, որ էլի վատ է, Արտաշես Վարդանյանին հանել են միջանցք։ Միջանցքում արյուն է հետ տվել։ Տղայի խոսքերով` այդ արյունը մի օրվա արյուն չի եղել, թարմ արյուն չի եղել, երևացել է, որ մի քանի օրվա արյուն է հետ տվել»,- պատմում է փաստաբանը։

Էրիկ Բեգլարյանն ասում է՝ տղան տեղում ստուգել է հոր զարկերակը և տեսել, որ զարկեր չկան։ Հետագայում, երբ հիվանդանոց են տեղափոխել Արտաշես Վարդանյանին, հայտնել են, որ զարկերակի զարկը 20 է։ «Բայց տղան ասում է` ես հստակ գիտեմ, որ իմ պապան ստեղ է մահացել, իմ մոտ է մահացել, իմ ձեռքերում է մահացել»,- նշում է Բեգլարյանը։

Փաստաբանն ասում է՝ այսօրվա դրությամբ դեռ չեն դիմել Քրեակատարողական ծառայությանը՝ պարզաբանում ստանալու համար։  

Նշենք, որ Արտաշես Վարդանյանը մեղադրվում էր թմրամիջոցների մաքսանենգության մեջ: Նույն մեղադրանքով կալանավորված է նաև նրա որդին:

Առողջապահության նախարարության խոսնակ Մարիամ Ծատրյանը «Հետքին» հայտնեց, որ Արտաշես Վարդանյանը քրեակատարողական հիմնարկ մուտք գործելու օրվանից անցել է բոլոր սքրինինգները և ստուգումները, որևէ գանգատ այդ ժամանակ չի ունեցել, առողջական որևէ խնդիր չի ունեցել։ «Ընթացքում ունեցել է որոշակի գանգատներ, հիմնականում՝ գլխացավեր։ Ցանկացած գանգատին բուժհիմնարկը արձագանքել է, տրվել է գանգատին համապատասխան դեղորայքային բուժում, ընթացիկ նաև իրականացվել են և՛ ռենտգեն, և՛ սոնոգրաֆիա, ինչի կարիք, որ ունեցել է։ Հետազոտություն իրականացվել է, որևէ լուրջ առողջական խնդիր ինքը չի ունեցել»,- նշեց նախարարության խոսնակը։

Մարիամ Ծատրյանը հավելեց, որ փաստաբանները «Քրեակատարողական բժշկության կենտրոն» ՊՈԱԿ-ին գրավոր որևէ նամակ չեն ուղարկել առողջական վիճակի մասին։ Նախարարության խոսնակը նշեց, որ այս պահին որևէ բան չի կարող ավելացնել, քանի որ դատաբժշկական փորձաքննություն պետք է իրականացվի։ Նախարարության խոսնակը կրկնում է՝ «տվյալ քաղաքացին բուժօգնություն ստացել է իր՝ այնտեղ գտնվելու շրջանում՝ մուտք գործելուց սկսած, և բոլոր գանգատներին արձագանք տրվել են»։