Երկու տարվա դատաքննությունից հետո Հակակոռուպցիոն դատարանը վճռել է մեղավոր ճանաչել Ոստիկանության Լոռու մարզային վարչության Ստեփանավանի բաժնի պետի տեղակալներ Սարգիս Վահրադյանին և Վահրամ Խաչատրյանին՝ Վրեժ Մկրտումյանին բռնության ենթարկելու համար: Դատարանը՝ նախագահությամբ Մերի Մոսինյանի, յուրաքանչյուրին դատապարտել է 3 տարի ժամկետով ազատազրկման՝ հանրային ծառայության պաշտոն զբաղեցնելու իրավունքից զրկելով 1 տարի ժամկետով: Սակայն, ինչպես սովորաբար լինում է պաշտոնյաների դեպքում, ազատազրկման ձևով նշանակված պատիժը պայմանականորեն չի կիրառվել՝ սահմանելով փորձաշրջան՝ 3 տարի ժամկետով:

Ոստիկանության պաշտոնյաներին մեղադրանքն առաջադրվել էր պաշտոնեական լիազորություններն անցնելու համար, որը զուգորդվել է բռնություն, զենք կամ հատուկ միջոցներ գործադրելով:

• Ոստիկանական անպատիժ բռնություններ

Լոռու մարզի բնակիչ Վրեժ Մկրտումյանն ընկերոջ հետ 2021թ. հոկտեմբերի 29-ին «Զվարթնոց» օդանավակայանում դիմավորել էր Ուկրաինայի Հանրապետությունից ժամանած ծանոթին ու կեսգիշերին Ստեփանավան-Տաշիր ավտոճանապարհով տուն էին գնում։

Նույն ժամանակ, ինքնությունը չպարզված մի խումբ անձինք Տաշիր քաղաքում ավազակություն էին կատարել: Դեպքը բացահայտելու և հանցանք կատարած անձանց հայտնաբերելու նպատակով Ոստիկանության Լոռու մարզային վարչության և ենթակա տարածքային ստորաբաժանումների ծառայողներն անցել էին ուժեղացված ծառայության։

Ստեփանավան-Տաշիր ավտոճանապարհին ծառայություն էին իրականացնում Ստեփանավանի բաժնի պետ Սուրեն Բագրատունյանը, օպերատիվ գծով տեղակալ Վահրամ Խաչատրյանը և անձնակազմի գծով տեղակալ Սարգիս Վահրադյանը: Ժամը 04:40-ի սահմաններում Ստեփանավանի բաժնի պետն ու երկու տեղակալները ճանապարհին կանգնեցնում են պատահական ընթացող ավտոմեքենան, որում Վրեժ Մկրտումյանն էր՝ իր ծանոթի եւ վարորդի հետ, և պահանջում, որ բոլորը դուրս գան ավտոմեքենայից:Սուրեն Բագրատունյանը, իրեն հատկացված հաշվեցուցակային զենքը՝ «Մակարով» տեսակի ատրճանակը ձեռքին, մոտեցել է ավտոմեքենայի վարորդին, իսկ նրա տեղակալներ Վահրամ Խաչատրյանը և բաժնի պետի տեղակալներից Սարգիս Վահրադյանը մոտեցել են Վրեժ Մկրտումյանին: Վերջինս մատնացույց անելով ավտոմեքենայի մեջ գտնվող օդորակիչը, Վրեժ Մկրտումյանին հարցրել է, թե ինչ է դա: Վրեժ Մկրտումյանը փորձել է ճշտել, թե ինչ նկատի ունի, այնուհետև, ընկալելով հարցի իմաստը՝ անմիջապես պատասխանել է՝ «կոնդիցիոներ»: Վրեժի հարցը զայրացրել է Վահրամ Խաչատրյանին եւ նա ասել է, որ հարցին հարցով չպատասխանի: Ապա բարձրաստիճան ոստիկանը բռունցքով հարվածել է Վրեժ Մկրտումյանի գլխին:

Քաղաքացիական ավտոմեքենայի դիմապակու մոտ տեղադրված է եղել ընթացքը տեսաձայնագրող տեսախցիկ, որն աննկատ է մնացել բարձրաստիճան ոստիկանների աչքից: Նրանց բռնարարքը տեսաձայնագրվել է: Այդ ընթացքում բաժնի պետը, ատրճանակը ձեռքին, քայլել է ավտոմեքենայի առջևով՝ որևէ ձևով չմիջամտելով իր ենթակաների բռնի գործողություններին։

Սարգիս Վահրադյանի և Վահրամ Խաչատրյանի մասով մեղադրական եզրակացությունը Հակակոռուպցիոն քրեական դատարան է ուղարկվել 2023թ. մարտին՝ դեպքից մոտ 1,5 տարի անց: Ստեփանավանի բաժնի պետ Սուրեն Բագրատունյանի նկատմամբ քրեական հետապնդում չի հարուցվել՝ արարքում հանցակազմ չեն տեսել:

«Ազատություն» ռադիոկայանը պարզել է, որ 2025թ. գարնանը Պաշտպանության նախարարը Լոռու մարզի զինվորական կոմիսար է նշանակել  Սարգիս Վահրադյանին: Այսինքն՝ նախարար Սուրեն Պապիկյանն իմանալով, որ Ս. Վահրադյանն անցնում է քաղաքացու նկատմամբ բռնություն կիրառելու գործով, նրան բարձր պաշտոնում է նշանակել:

Ռադիոկայանի տվյալներով՝ Վահրամ Խաչատրյանն էլ տեղափոխվել է ոստիկանության Վանաձորի բաժին՝ դարձյալ նշանակվելով պետի տեղակալի պաշտոնում:

Պետական տարբեր օղակներում հայտարարում են, թե բռնությունն ու վատ վերաբերմունքը տեղ չունեն համակարգում, սակայն այդ հայտարարություններին հակառակ ոչ միայն մեղմ վերաբերմունք ցուցաբերվում արարքները կատարողների նկատմամբ, այլև նրանց «խրախուսում»՝ նոր պաշտոններով:

Գործի քննության ընթացքում Վրեժ Մկրտումյանի փաստաբան Արա Ղարագյոզյանը պնդում էր՝ դատարանի առջև կանգնած ոստիկանների արարքը ճիշտ չի որակվել: Ոչ թե լիազորությունների անցում է տեղի ունեցել, այլ խոշտանգում: Բողոքարկել են հնարավոր ատյաններում, սակայն՝ ապարդյուն։

Նշենք, որ Սարգիս Վահրադյանն ու Վահրամ Խաչատրյանը համաձայն չլինելով մեղադրական դատավճռին՝ 2025թ. սեպտեմբերի 5-ին բողոք են ներկայացրել Վերաքննիչ քրեական դատարան: Բողոքը քննության առնելու վերաբերյալ տեղեկություններ չկան:

Լուսանկարը՝ էկրանակադր միջադեպի տեսագրությունից