2025 թվականի հունվար-օգոստոսին Հայաստանի տնտեսական ակտիվության ցուցանիշը (ՏԱՑ), նախորդ տարվա նույն ժամանակաշրջանի համեմատ, 7.1%-ով աճել է։ Ինչպես ցույց են տալիս Վիճակագրական կոմիտեի տվյալները, միայն օգոստոսին ՏԱՑ-ն աճել է 7.5%-ով՝ նախորդ տարվա նույն ամսվա համեմատ։

Ութ ամսվա կտրվածքով (հունվար-օգոստոս) առավել բարձր աճ է գրանցվել շինարարության ոլորտում։ Նշված ժամանակահատվածում շինարարության ծավալը կազմել է մոտ 375 մլրդ դրամ՝ նախորդ տարվա նույն ամիսների համեմատ աճելով 20.4%-ով։ Հունվարից սկսած շինարարության ոլորտն աճում է երկնիշ տեմպով, աճն արագացել է հատկապես մայիսից։

Աճի տեմպով ծառայությունների ոլորտը զիջում է միայն շինարարությանը։ Նշված ոլորտում 10.2% աճ է գրանցվել։ Բացարձակ թվով ծառայությունների և մյուս ոլորտների ծավալները մի քանի անգամ գերազանցում են շինարարությանը։ Դա է պատճառը, որ չնայած շինարարության աճի տեմպն ավելի մեծ է, սակայն տնտեսական աճին նպաստելու չափով ծառայություններն ու առևտուրը գերազանցում են շինարարությանը։ Ութ ամսում ծառայությունների ծավալը կազմել է 2 տրլն 596 մլրդ դրամ։

Նույն ընթացքում առևտրաշրջանառությունը երկրում կազմել է 4 տրլն 141 մլրդ դրամ՝ աճելով 3.9%-ով։

Ութ ամսվա կտրվածքով արդյունաբերության ոլորտում 7.8% անկում է գրանցվել։ Արդյունաբերական արտադրանքի ծավալը 1 տրլն 771 մլրդ դրամ է։ Ուշագրավ է, որ ամսական կտրվածքով դիտարկելիս տեսնում ենք, որ հուլիսին և օգոստոսին արդյունաբերության ծավալները սկսել են աճել։ Նախորդող ամիսներին գրանցված անկումները, որոնց հետևանքով ութ ամսվա կտրվածքով անկում կա, պայմանավորված են նախորդ տարվա բարձր բազայով՝ ոսկերչության ոլորտի կասկածելի աճերով։

• Խոր անկում՝ արդյունաբերության ոլորտում

Հայաստանի կառավարությունն ակնկալում է, որ 2026 թվականին Հայաստանում 5.4% տնտեսական աճ կգրանցվի, համախառն ներքին արդյունքը կկազմի 11.9 տրլն դրամ։

Այս ցուցանիշն ամրագրված է Բյուջե-2026-ի նախագծում։

Արտաքին առևտուրը մեծ թափով կրճատվում է

2025 թվականի հունվար-օգոստոսին Հայաստանը աշխարհի հետ 12.9 մլրդ դոլարի առևտուր է արել։ Նախորդ տարվա նույն ժամանակաշրջանի համեմատ այն 41.1%-ով աճել է։

Անկում է ապրում ինչպես արտահանումն, այնպես էլ ներմուծումը։ 

Մասնավորապես, նշված ամիսներին Հայաստանից արտահանվել է 5 մլրդ դոլարի ապրանք, որը նվազել է 48.8%-ով։ Այս կտրուկ անկումն առաջին հերթին պայմանավորված է դեպի Արաբական Միացյալ Էմիրություններ ոսկու արտահանման (այս դեպքում՝ վերաարտահանման) կրճատմամբ։ 

• Ի՞նչ է թաքնված Գևորգ Պապոյանի ներկայացրած «ճոխ» աճերի հետևում

Նույն ընթացքում ներմուծումը կազմել է 7.9 մլրդ դոլար՝ նվազելով 34.9%-ով։ Ներմուծման անկումը ևս վերաարտահանումների կրճատման հետևանքն է։