Այսօր` հոկտեմբերի 9-ին, տեղի ունեցավ «Միասնության թևեր» շարժման հիմնադրման միջոցառումը։ Շարժումն առաջնորդելու է Մարդու իրավունքների նախկին պաշտպան Արման Թաթոյանը:

Միջոցառման ընթացքում ելույթ ունեցան Արման Թաթոյանը, ՊԵԿ նախկին նախագահ Դավիթ Անանյանը, Լուսինե Ղազարյանը և Արեն Մեհրաբյանը: 

Թաթոյանն անդրադարձավ Հայաստանի ներքին և արտաքին քաղաքական, առողջապահական, անվտանգային հարցերին և կոռուպցիայի դեմ պայքարի կարևորությանը: Խոսեց նաև եկեղեցի-պետություն և Հայաստան-սփյուռք  հարաբերությունների՝ իր պատկերացրած մոդելի մասին:

«Մենք պետք ենք իրար: Հայաստանն առանց սփյուռքի թույլ է, իսկ սփյուռքը առանց Հայաստանի երկար գոյատևել չի կարող»,- ասաց Թաթոյանը:

Նախկին ՄԻՊ-ը նաև կարծիք հայտնեց, որ հարմարվողական արտաքին քաղաքականությունից պետք է անցում կատարել ճկուն արտաքին քաղաքականության:

«Հակադրության դարաշրջանն ավարտվել է, եկել է համագործակցության ժամանակը»,-ելույթն ավարտելով՝ նշեց Թաթոյանը:

Շարժման տնտեսական բլոկը ներկայացրեց Դավիթ Անանյանը: Նա խոսեց Հայաստանի արդյունաբերական պոտենցիալի ընդլայնման և տնտեսության կերպափոխման անհրաժեշտության մասին:

Հայաստանի յուրաքանչյուր քաղաքում կառուցել երկու արդյունաբերական ձեռնարկություն, արհեստական բանականությունը ինտեգրել ռազմադյունաբերության մեջ, մեծացնել մասնակցությունը տիեզերքի ուսումնասիրությանը. սրանք էին տնտեսական ոլորտում Անանյանի նշած առաջնահերթությունները:

Սոցիալական ոլորտի բարեփոխման վերաբերյալ շարժման մոտեցումները ներկայացեց Լուսինե Ղազարյանը: 

Ղազարյանի կարծիքով՝ անհրաժեշտ է ապահովել հավասար ելակետային հնարավորություններ բոլորի համար: «Սոցիալական արդարությունը համերաշխության հիմք է»,-ասաց Ղազարյանը:

Միջոցառման ավարտին տեղի ունեցավ շարժման առաջնորդ Արման Թաթոյանի մամուլի ասուլիսը, որի ընթացքում Թաթոյանը հայտարարեց, որ մասնակցելու են առաջիկա խորհրդարանական ընտրություններին: Թե ինչ ձևաչափով կլինի մասնակցությունը` առանձին, թե դաշինքով՝ Թաթոյանը չհստակեցրեց: