2025թ. նոյեմբերի 16-ին Վաղարշապատ համայնքում տեղի կունենան ավագանու ընտրություններ: Ընտրապայքարին 8 քաղաքական ուժ է մասնակցում: Ընտրությունները համայնքի համար կարևոր իրադարձություն են, քանի որ ձեւավորվելիք տեղական իշխանությունը որոշելու է համայնքի զարգացման ռազմավարությունը առաջիկա տարիներին: «Հետքի» զրուցակիցը «Հանրապետություն» կուսակցության ընտրական ցուցակը գլխավորող Հարություն Մկրտչյանն է:

Թեկնածուի հետ խոսել ենք իր կուսակցության նախընտրական ծրագրի, Վաղարշապատ համայնքի տարիներ շարունակ չլուծված հարցերի՝ բազմաբնակարան շենքերի տանիքների, կոյուղագծերի, ճանապարհների մասին: 

«Ես գիտեմ, որ համայնքապետի պարտականությունն է համայնքը մաքուր, բարեկարգ պահելը, կանաչ գոտիներն ավելացնելը, եղած կանաչ գոտիները պահպանելը և այդպես շարունակ: Տասնամյակներով կուտակված բազմաթիվ խնդիրներ կան, բայց ես դա չեմ վաճառում, որովհետև գիտակցում եմ՝ դա իմ պարտականությունն է լինելու»,- ասում է «Հանրապետություն» կուսակցության թեկնածուն:

Հ. Մկրտչյանն անդրադարձել է նաև հանրային քննադատության արժանացած իր այն հայտարարությանը, որ թափառող շների հարցը երկու ամսվա ընթացքում հնարավոր է լուծել:

«Պարտավորվում եմ վաղարշապատցիների առաջ, որ 2 ամսում էականորեն և շոշափելիորեն կլուծեմ այդ խնդիրը: Ինչպե՞ս, այդ թվում՝ այն կենդանասերների օգնությամբ, ովքեր սերտաճել և ստերջացնել բառերի սայթաքումը մատի փաթաթան ու դրոշակ էին դարձրել: Իրենք կգան, մեր հատկացրած շների կացարանում շներին կխնամեն, եղունգները կխարտեն, նրանց իրավունքները կպաշտպանեն, ոնց որ հիմա են պաշտպանում ու շատ լավ են անում: Ու ես կապացուցեմ, որ դա հնարավոր է երկու ամսում և ավելի երկարաժամկետ հատվածում լուծել, ու իրենք պարտավոր են գալ ու ինձ սատար կանգնել, որովհետև ես այդ խնդիրների լուծման ճանապարհին բնավ չեմ պատրաստվում բռնություն գործադրել շների նկատմամբ»,- ասում է Հարություն Մկրտչյանը: