Եվրոպական Միության ժամանակակից ճարտարապետության/Միս վան դեր Ռոե մրցանակը (EUmies Awards) ստեղծվել է 1988 թ.-ին Բարսելոնայում։ Այն համարվում է Եվրոպայի ամենահեղինակավոր ճարտարապետական մրցանակաբաշխությունը, որը երկու տարին մեկ ընտրում է ժամանակակից ճարտարապետության լավագույն օրինակները։

Գերմանացի ճարտարապետ-մոդեռնիստ Լյուդվիգ Միս վան դեր Ռոեի անվան մրցանակի նպատակն է ցույց տալ, թե ինչպես է ճարտարապետությունը նպաստում կայուն զարգացմանը, շրջակա միջավայրի պահպանությանը և հասարակության բարեկեցությանը։ Ժյուրին գնահատում է ոչ միայն շինարարական, այլև մշակութային, սոցիալական ու ստեղծագործական մոտեցումները։

Երեկ՝ նոյեմբերի 6-ին, EUmies-ին հրապարակեց 2026 թ.-ի մրցանակաբաշխության թեկնածուների ցուցակը։

Հայաստանյան 4 նախագիծ (նախնական 5-ից) հայտնվել են եվրոպական ամենահեղինակավոր ճարտարապետական մրցանակաբաշխության առաջադրվածների ցուցակում։

Հայաստանից առաջադրված չորս նախագծերը, որոնք ընտրվել են անկախ փորձագետների կողմից՝

Hotel «Manifest» (Գյումրի) – հեղինակ՝ Archcoop.

Private House in Rind (Մասնավոր տուն) – հեղինակ՝ Archcoop.

COAF - Child and Family Centre (Մանուկների և ընտանիքի կենտրոն) – հեղինակ՝ Alberto Campo Baeza.

Lumen Coffee 1936 (Երևան) – հեղինակ՝ snkh.

Եվրոպայի ամենահեղինակավոր ճարտարապետական մրցույթում ցուցադրվում են եվրոպական ճարտարապետության լավագույն նվաճումները, և հայ ճարտարապետների մասնակցությունը հնարավորություն է այս կարևոր հարթակում դառնալու միջազգային քննարկման մաս։

Մրցանակաբաշխությանը ներկայացված է ընդհանուր առմամբ 410 աշխատանք 40 երկրից, որոնք ավարտվել են 2023 թվականի մայիսից մինչև 2025 թվականի ապրիլ ընկած ժամանակահատվածում։

Միջազգային ժյուրին, որը գլխավորում է ճարտարապետ Սմիլյան Ռադիչը 2026թ.-ի հունվարին կհրապարակի 40 նախագծից բաղկացած կարճ ցուցակը։

Փետրվարին կհայտարարեն եզրափակիչ անցած յոթ նախագծերը։

Կարդալ նաև՝

• Ճարտարապետական իրադարձություններ. «Սնխ»-ի Աշոտն ու Արմինեն
• Ճարտարապետական իրադարձություններ. «Սնխ»-ի Աշոտն ու Արմինեն

Լուսանկարները՝ EUmies Awards կայքից