20:00-ին Վաղարշապատում քվեարկություն ավարտվել է, քվեարկությանը մասնակցել է ընտրական իրավունք ունեցող քաղաքացիների 45.12%-ը կամ 31 հազար 527 ընտրող։

Վաղարշապատ համայնքում ընտրական իրավունք ունի 69 հազար 866 քաղաքացի։

Մասնակցության ամենացածր ցուցանիշը գրանցվել է Էջմիածին քաղաքում՝ 41․3%, որտեղ ընտրության իրավունք ուներ 44 հազար 947 քաղաքացի։ Ամենաակտիվ բնակավայրը եղել է Լեռնամերձը, որտեղ քվերակության իրավունք ուներ 341 անձ, որը ընտրելու իրավունք ունեցող քաղաքացիների թվով ամենափոքրն է՝ համեմատած Վաղարշապատ համայնքի մյուս բնակավայրերի։ Լեռնամերձցիների 63․6%-ը մասնակցել է քվեարկությանը։

Այս ընտրությունները, համեմատած Վաղարշապատ համայնքի ավագանու նախորդ՝ 2021 թվականի ընտրությունների, ավելի ակտիվ էին։ 2021 կայացած ավագանու ընտրություններին (Վաղարշապատ և Խոյ համայնքները միասին, որոնք այժմ միավորվել են) ընտրելու հնարավորություն ունեցողների 28%-ն էր մասնակցել։

Հիշեցնենք՝ ընտրություններին մասնակցում է 8 քաղաքական ուժ՝ «Հայրենիք», «Քաղաքացիական պայմանագիր», «Ազատ դեմոկրատներ», «Մայր Հայաստան» ազգային-դեմոկրատական, «Ժառանգություն», «Հանրապետություն», «Համահայկական ճակատ» կուսակցություններն ու «Հաղթանակ» կուսակցությունների դաշինքը՝ կազմված «Հայ Յեղափոխական Դաշնակցություն» և «Առաջ» աջակենտրոն կուսակցություններից:

Այս ընտրություններն արտահերթ են, քանի որ 2025թ. մայիսին համայնքի ղեկավարի և ավագանու անդամի պաշտոնից հրաժարականի դիմում է ներկայացրել Վաղարշապատ համայնքի ղեկավար Դիանա Գասպարյանը: Դրանից հետո նախաձեռնվեցին ավագանու արտահերթ ընտրություններ:

Հիշեցնենք՝ «Հետքը» գրել էր, որ Վաղարշապատ համայնքի ղեկավար Դիանա Գասպարյանի ամուսնու ընտանիքն Էջմիածնում առանձնատների կառուցման բիզնես է սկսել: Այդ նպատակով, գործընկերների օգնությամբ, ձեռք է բերվել համայնքային հողատարածք և, չսպասելով թույլտվություններին, հողային և բետոնացման աշխատանքներ են կատարվել:

Մեր հրապարակումից հետո քրեական վարույթ է նախաձեռնվել: Մեղադրանքներ են առաջադրվել Դիանա Գասպարյանին, ամուսնուն, որը Վաղարշապատ համայնքի ավագանու անդամ է, ինչպես նաև սկեսրոջը։