Քննչական կոմիտեի շենքում դեկտեմբերի 4-ին ձերբակալել են Մայր Աթոռի դիվանապետ Արշակ արքեպիսկոպոս Խաչատրյանին։ Այս մասին իր ֆեյսբուքյան էջում գրել է Արշակ արքեպիսկոպոս Խաչատրյանի փաստաբան Արսեն Բաբայանը։

Թե ինչու է ձերբակալվել սրբազանը, Բաբայանը չի նշել, սակայն հայտնել է, որ ձերբակալումը կապված չէ ավելի վաղ տարածված ինտիմ բնույթի տեսանյութերի հետ։

• ՔԿ «եզրակացությամբ» ամբողջությամբ հերքվում է Արշակ Սրբազանի մասնակցությունը տեսագրությունում․ փաստաբան

Քննչական կոմիտեից «Հետքին» փոխանցեցին, որ քրեական վարույթի նախաքննության ընթացքում անձի նկատմամբ հարուցվել է հանրային քրեական հետապնդում՝ Քրեական օրենսգրքի 393-րդ հոդվածի 2-րդ մասի 1-ին և 4-րդ կետերով (մի խումբ անձանց կողմից նախնական համաձայնությամբ թմրամիջոց ապօրինի իրացնելը՝ հանդիսադիր վայրում):

«Հետքի» տեղեկություններով, այս վարույթը վերաբերում է Արշակ սրբազանին։

Թարմացում

Արշակ արքեպիսկոպոս Խաչատրյանի փաստաբան Արսեն Բաբայանը ֆեյսբուքյան գրառմամբ հայտնել է, որ սրբազանին մեղադրում են 2018-ին Վեհափառի դեմ ակցիա («Նոր Հայաստան, նոր հայրապետ» խորագրով-խմբ) իրականացնողներից մեկին վարկաբեկելու նպատակով պայուսակում թմրամիջոց դնելու համար: